Parlamentario di partido MAS, Marisol Lopez Tromp a publica riba su rednan social un video den cual a duna comentario riba e situacion di ‘spookambtenaar’. E tema di ‘spookambtenaar’ a hala atencion publico un biaha mas despues cu siman pasa, Ministerio Publico a anuncia cu a yega na un acuerdo cu un persona kende a keda proba di tabata un di e asina-yama ‘spookambtenaar’.
Pueblo por recorda cu e tema di ‘spookambtenaar’ a bira explosivo durante e reunion den Parlamento unda gobierno di e tempo ey, coalicion MEP-POR-RED a entrega mocion pa retira Lopez Tromp for di su posicion di minister na aña 2020. Su defensa pa su posicion na e momento eyno tabata mustra di lo a bira uno asina impactante. Pasobra su ilustracion di tur e casonan di corupcion y problema financiero cu el a topa tanto na Serlimar como DIP ta locual a capta tur atencion. Contratonan pa trahador spirito, compania di parlamentario den Serlimar, proceduranan robez na DIP y un ‘gedoogbeleid’ pa permiti piscamento cu harpun y pa UTVnan drenta Parke Nacional Arikok, ta apenas algun di e casonan cu a yama mas atencion durante e reunion maratonico di Parlamento.
E tema di ‘spookambtenaar’ a keda bin dilanti cu transcurso di tempo, te cu siman pasa, Ministerio Publico a anuncia cu a cera un acuerdo di transaccion den e caso Flamingo cu e sospechoso Hans J.P. Geerman pa un suma di Afl. 125.280,13. Geerman ta wordo sospecha di a estafa Pais Aruba y di corupcion activo di minister di ruimtelijke ontwikkeling, infrastructura y medio ambiente (ROIM) durante e periodo di prome di april 2019 te 30 di maart 2021. Den e investigacion Geerman a wordo identifica como un asina yama spookambtenaar of ambtenaar spirito. Ministerio Publico ta opina cu e investigacion a mustra cu e minister a nombra Geerman como medewerker bedrijfsvoering, pero cu e no tabatin mester a haci ningun trabao en cambio y cu e no a haci ningun trabao tampoco. A cambio pa e sueldo cu el a cobra di Pais Aruba, e tabata si haci propaganda pa e minister na radio.
“Mientras cu den e dianan aki hopi hende ta concentrando riba Halloween, netamente awo, Ministerio Publico a dicidi saca un comunicado den cual ta splica un caso di ‘spookambtenaar’ e ambtenaar spirito,” Lopez Tromp ta bisa na comienso di su video. “Pa tur claridad, ambtenaar spirito ta un persona cu ta cobra sin produci trabao.”
“Esaki ta algo cu nos sa for di tres aña pasa caba. Net tres aña pasa, mi a duna di conoce den Parlamento di Aruba cu mi a bin topa e fenomeno aki den ministerio, caminda m’a traha como minister pa apenas un luna,” el a recorda. “E tempo ey den Parlamento, mi a duna un splicacion kico ta spirito? Con a wak spirito? Y den e caso ey e spiritonan aki hasta tin cu a protesta ora cu nan wordo kita for di trabao. Pasobra si no ta produci, si no t’ey, y si no tin nada pa sali fo’i loke nan mester haci, nan no por keda traha. Pero nos ta wak aworaki cu tabatin spirito cu a protesta cu a wordo kita fo’i trabao y hasta a lanta caso den Corte pa bringa pa keda spirito.”
E video ta mustra imagennan di Lopez Tromp di 2020 den Parlamento unda tabata cuestiona e corupcion y estafa, e falta di integridad cu ta resulta den e ambtenaarnan spirito en cuestion. Ademas di cuestiona e rol di gobierno den corupcion, Lopez Tromp tambe tabatin critica riba e hecho cu “en bes cu nan apoya e pasonan aki,” parlamentarionan di MEP a “protesta contra e pasonan aki.”
El a indica tambe cu el a entrega henter un lista cu nomber di persona y compania cu ta ‘spookambtenaar.’ Concluyendo cu e tema di temor di Halloween, Lopez Tromp a finalisa bisando: “Mas spirito ta saliendo. Spiritonan cu hopi hende no por kere, y spiritonan cu awe nan cara ta bira conoci. Nos ta wak cu awe e realidad ta sali, y cu mas spirito ta bay sali.”
