(AP) – E grupo di drechonan humano Amnesty International a bisa diamars cu ciudadanonan den parti sur di Lebanon a ser herida e luna aki ora cu forsanan Israeli a ataca un bario na frontera cu balanan cu a contene fosfaat blanco, un municion incendiario controversial.
E organisacion aki a bisa cu nan a verifica 3 otro instancia unda Israel su ehercito a usa fosfaat blanco na e areanan cu e frontera di Lebanon luna pasa, sinembargo den e casonan aki no a documenta daño na e ciudadanonan.
E grupo a bisa cu e uso di fosfaat blanco ta ilegal bao ley internacional ora cu e kimico ta ser usa den areanan pobla. Esaki por causa cu edificionan of te hasta hende pega na candela. Sobrevivientenan ta den riesgo di infeccion y fayo di respiracion of daño di organo, aunke e kemadura ta chikito.
Despues di un atake Israeli na Duhaira, casnan y autonan a pega na candela y 9 ciudadano a ser herida y mester a bay hospital cu problemanan di respiracion a causa di e huma segun Amnesty. E grupo a informa tambe cu a verifica potretnan unda ta mustra e balanan cu fosfaat blanco banda di artileria Israeli na e frontera tenso entre Lebanon cu Israel. E organisacion a describi e incidente como “un atake cu a causa daño na ciudadanonan” y mester ser investiga como un crimen di guera.
