Ex minister Rudy Lampe: “Prome Minister sa e horcan cu ta biniendo y e kier presiona”

Durante un entrevista cu Bon Dia Aruba, lider di Partido Red Democratico, Ricardo Croes y ex minister di Enseñansa, Rudy Lampe, a elabora ariba diferente tema y topico, entre nan e topico di LAft y RAft cu ta keda uno relevante pa Aruba.

Recientemente Prome Minister, Evelyn Wever-Croes a biaha pa Hulanda pa reuni cu Conseho di Minister di Reino pa asina presenta e propuesta di Aruba pa amienda den e ley local pa supervision financiero (LAft), pero Hulanda no a aproba e propuesta aki. Un hecho, cu segun Partido Red Democratico, no tabata un sorpresa y tabata algo cu hopi a anticipa.

“Nan ta hopi interesa pa scapa a LAft a toda costa. LAft a bin bao di AVP y aworaki MEP a bras’e pasobra e kier evita e RAft y p’esey el a core bay Hulanda, pa wak si e por yega na un acuerdo pasobra ya caba Parlamento ta bay drenta den receso den december y mester aproba e ley di LAft prome cu december” Lampe a comenta.

Hulanda a bin cu tres condicion nobo pa Aruba y a manda Gobierno di Aruba pa sinta na mesa back cu Secretario di Estado pa Relacionnan di Reino, Alexandra van Huffelen, pa yega na un acuerdo ariba e tema aki.

Sr. Croes a remarca cu Gobierno di Aruba ta bay haci todo por todo pa yega na un acuerdo di LAft, pero si Hulanda a pone cierto condicion y Aruba no acepta, a base di Aruba su Statuut Hulanda por interveni.

“E wega cu tabatin ta cu Prome Minister ta pretende cu e kier participa cu Hulanda, pero Parlamento di Aruba ta contra. Esaki ta e wega cu ta wordo hunga pasobra e coalicion di Parlamento su trabao ta pa sostene gobierno; y despues cu mi tabata parlamentario, mi a siña con nan ta traha. Nan ta bin hunto, ta sinta, ta plania y despues ta bin parlamento pa bay di acuerdo cu ley of bay contra di ley. E unico diferencia e tempo ey tabata cu tabatin partido Red den e coalicion, e no tabata bay dje facil ey,” el a indica.

Segun el a señala, e wega cu Gobierno di Aruba ta hunga ta cu Hulanda ta pone condicion, gobierno ta firma e condicion aki, ta bay Parlamento cu esaki pasobra Parlamento mester aproba kico gobierno ta haci of desaproba, y den compromiso cu nan mes ta haci internamente, nan ta plania con nan ta desaproba loke gobierno ta presenta.

El a splica cu Aruba ta autonomo, tin un parlamento, kiermen cu mester bay parlamento, cual ta un derecho y obligacion. Pero, el a subraya, Aruba ta den reino Hulandes y esey ta significa cu tin un Parlamento di Reino, tin un Gobierno di Reino y tin un Statuut. Esaki, el a bisa, ta significa cu tin un autoridad di un organo mas halto cu esnan di e miembronan di reino, den e caso aki di e islanan.

E autoridad aki, el a indica, den caso cu e islanan no ta percura pa entre otro orden publico, atencion debido pa derechonan humano, etc., por interveni y e por tuma decisionnan pa garantisa cu e finanzas publico ta na ordo. Pero pa tuma un paso asina, Croes a señala, e ta un paso hopi drastico, e no ta un paso cu ta wordo tuma asina sin mas. Cos mester ta hopi mas malo y mester tin indicacion- y pruebanan palpable ariba e situacionnan.

Ex-minister Lampe a agrega cu tin otro factor tambe cu ta hunga un rol. El a splica cu no ta un decision di un, dos tres, pa Hulanda dicidi pa pone Aruba bao curatela financiero via un decreto real. Y Statuut ta duna autoridad na Hulanda, pero dia 22 di november tin eleccion na Hulanda y p’esey, el a remarca, Prome Minister Wever-Croes kier pusha un acuerdo prome cu eleccion, pasobra e resultado di eleccion aki ta mustra cu ta bay tin un cambio di ideologia politico y ta mustra cu e partidonan di derecha ta bay gana e eleccion aki.

“Ta mustra e ora ey cu e proximo gobierno di Hulanda si no ta bay pensa un dos tres. E ta bay ta hopi mas man duro cu loke ta finanzas publico. Y e partido [di Pieter] Omzicht (Nieuw Sociaal Contract) a pone caba den su programa cu pa duna fiansa na Aruba den futuro ta bay tin condicionnan hopi mas estricto. Prome Minister sa e horcan cu ta biniendo y e kier presiona y p’esey el a bay Hulanda, presiona pa yega na un acuerdo prome cu e horcan, pero e no ta bay logra,” Lampe a indica.

Sr. Croes a remarca cu e vision di Partido Red Democratico, desde cu el a drenta e partido na 2013, un di e prome temanan cu el a enfoca riba dje tabata economia. El a enfatisa cu Aruba mester otro pilar economico pa genera mas placa y unabes cu genera mas placa, gobierno por atende e diferente necesidadnan di e pais, riba cual tereno cu e ta.

“Pero pa atende cu nan bo no mester tin solamente placa, bo mester tin un bon plan, un vision. Y den e cuadro di vision di Partido Red Democratico economia ta prioridad y sector primario ta parti di dje,” el a resalta.

El a subraya cu hopi hende ta wak sector primario como uno di no importancia pasobra Aruba por importa for di rond mundo mas barata. Pero el a accentua cu tin un problema di salud tambe na e pais cu ta bay man den man cu cuminda procesa, e cuminda importa cu ciudadanonan ta consumi.

Croes a remarca cu 20% di ciudadanonan na Aruba ta diabetico y ademas tin un gasto halto den salubridad pa trata malesanan cu e comunidad mes, a base di tin un bon sector primario y controlando kico e agricultornan ta hinca den e berduranan, kico nan ta hinca den e cuminda cu e ciudadanonan ta come, por garantisa cu e pueblo tin cuminda mas saludable pa come.

Esaki tin un efecto ariba e gastonan di salubridad bahando nan drasticamente y na mesun momento ta mehora e calidad di bida di e ciudadanonan. “Esaki ta pone cu bo no ta depende tampoco di prestamonan di Hulanda den momentonan di pandemia ora cu economia a cay den otro pasobra ya bo tin un sistema crea,” el a resalta.

Sr. Lampe a agrega cu Partido Red Democratico, desde comienso, semper a enfatisa cu finanzas publico ta prioridad. “Con bo ta maneha e finanzas di pueblo, di esey ta depende e calidad di bida di bo ciudadano. Bo finanzas publico ta mescos cu un cas. Si e hefe di e cas tin hopi mas gasto cu entrada, e cas ey ta bay tin problema. Mescos ta conta pa un pais,” el a indica.