Dialuna 30 di october durante un rueda di prensa, Minister di Transporte, Integridad, Naturalesa y Asunto di Adultonan Mayor, Ursell Arends a anuncia cu cuminsando 4 di november te cu 16 di december ta bay acepta desperdicio di azeta di cushina residencial na Baki den Bario.

Baki den Bario, cu ya caba tin algun luna andando, ta un actividad unda cu ta trece diferente baki di desperdicio na cada districto di Aruba. Hende por trece nan desperdicio separa pa asina wordo procesa debidamente. Pues locual cu ta wordo colecta na Baki den Bario ta desperdicio cu lo tabatin chens di termina den nos naturalesa.

Segun Arends a indica, despues di a tende for di nos comunidad, a añadi mas tipo di desperdicio cu ta wordo acepta na e lista. A cuminsa cu desperdicio di bulk, construccion, metal, green waste y e-waste y incorpora desperdicio di carton y taira den e trayectoria di Baki den Bario. E siman aki, Minister Arends a anuncia cu tambe por trece azeta di cushina usa. Tambe Arends a indica cu awo a pasa na un fase unda Baki den Bario ta bay ta semanal, pues tur diasabra di 4 di november te 16 di december, di 7am te 11am.

Azeta di cushina ta un problema grandi pa nos tuberianan na cas y pa nos sistema di rioolering. Pues e awa mescla cu azeta cu ta yega nos RWZI ta afecta e planta negativamente. Di tur e azeta di cushina cu Aruba ta importa – cual ta tres miyon kilo – solamente 15 pa 20 porciento ta wordo exporta pa recicla. A pesar cu nunca lo nos por yega 100%, door di e azeta cu ta wordo absorbi den nos cuminda, tin hopi espacio pa mehoracion den e problematica aki.

Arends a indica cu azeta di cushina ta un tema hopi importante. “Tres luna pasa, Gobierno di Aruba, a traves di un decision den Conseho di Minister a instala un task force cu tin cu atende cu e tematica di fog – dus fat, oil y grease – cu nos tin den area turistico,” el a indica. “Constantemente esaki ta pega e mashinnan, e motornan cu ta zorg pa awa por yega na RWZI. Y nos a instala un comision pa asina nos por haci un analisis di e problematica di fog cu ta existi den e area akinan. Y e datonan cu nos a bin ta colecta tambe ta importante pa asina por agrega y atende cu e problematica aki. Akinan nos ta referi na e problema di azeta di cushina.”

Durante ronda di pregunta di prensa, Arends a contesta si ta teniendo cuenta cu azeta di motor tambe, indicando cu e task force tambe ta evaluando esaki. Arends a indica cu por spera cu e comision lo entrega nan plan di accion na gobierno pa dia 17 di november proximo, pa atende e problema di fog y tambe azeta di auto. El a recorda cu Carentra ya caba ta colecta azeta di auto, “pero lamentablemente no ta tur hende ta atende cu azeta di auto di un manera responsable,” el a comenta. “Ainda tin mecanico – manera ta bisa crioyamente – bao palo, cu ta deposita esaki den naturalesa, cerca di nan propio garage. Mi ta kere cu e conscientisacion mester yega na nan tambe. Pero mi ta convenci, mirando e resultado di Baki den Bario, cu nos comunidad ta dispuesto pa haci cambio na nan habitonan.”

Arends a bisa cu hopi biaha ta tira e azeta di cushina den zink, y e por plug tuberia causando daño cu por trece mas gasto pa doño di cas. “Pero esaki tambe ta conta den seno comercial, caminda cu tin reglanan caba, pero mester mehora e handhaving y toezight” pa asina por sigura cu ta tene na e reglanan aki. P’esey a instala e comision, segun Arends, “y e reglanan ta conta pa tur restaurant, pa tur snack truck y hasta hotelnan of cualkier otro caminda cu ta genera azeta di cushina usa.” El a recorda cu mester tin un “grease trap” pa sigura cu e azeta no ta cay den awa cu ta bay RWZI, cu lo causa daño na e planta di procesamento di awa y nos naturalesa.

Contestando pregunta di prensa tocante restaurantnan chikito den area di Playa cu ta basha e azeta di cushina den rioolnan, cu ta laga esakinan blokea cu azeta, Arends a bisa: “E problema ta hopi grandi. Tin reglanan, pero lamentablemente no ta tur hende ta tene nan mes na nan.”
El a indica cu e prome fase ta bay ta duna un “grace period” na esnan cu no tin grease trap instala, pa nan instala esaki. Y despues e control ta bay bira severo, “y si bo no ta cumpli, ya caba tin regla y ley cu ta duna oportunidad cu por duna boete.”

Pa e motibo aki a anuncia un colaboracion cu Paradise Scrap, cu ta un compania cu ta colecta azeta di cushina y ta exporta esaki pa debido procesamento. Tur azeta di cushina cu nan ta colecta ta wordo recicla y converti den ‘bio fuel’. Paradise Scrap lo tin un baki na cada evento di Baki den Bario cuminsando 4 di november unda cu nan lo colecta azeta di cushina. Ta pidi tur esnan cu lo haci uso di nan servicio na Baki den Bario pa por fabor trece nan azeta den containernan bon cera pa asina preveni cu esaki lo basha. El a bisa cu e compania Paradise Scrap tambe ta acepta azeta comercial, pues ta curasha pa tur trece azeta pa exportacion.

Minister Arends ta pidi tur esnan cu lo haci uso di Baki den Bario na Savaneta e fin di siman aki pa prepara y separa bon di antemano mirando cu hopi hende ta bin trece nan desperdicio y lo probablemente tin fila largo di auto.

Ta haci un yamado na pueblo di Savaneta pa separa y trece nan desperdicio diasabra awor na Veld di Undesa for di 7’or te cu 11’or di mainta. Pa mas informacion tocante Baki den Bario por bishita https://trashtocasharuba.org/limpilimpi