Grupo ambientalista, Aruba Birdlife Conservation a comparti nan preocupacion riba nan pagina di Facebook pa un tereno entre The Mill y House of Cheng, unda a destruccion di naturalesa a tuma lugar.
Segun ABC ta indica, e tereno en cuestion ta clasifica den e ROP nobo como Naturalesa y Paisahe (Natuur en Landschap.) Riba potretnan cu ABC a comparti, por nota con e tereno a wordo rosa y a kita tur mata cu tabatin, lagando e tereno bashi. Por asumi tambe cu cualkier neishi di parha of cualkier otro animal cu tabata biba den e area aki a keda destrui.
ABC ta cuestiona con por permiti e tipo di destruccion aki cu tin consecuencianan severo pa medio ambiente. E grupo a haci un comparacion cu e caso di Nigel Maduro, kende a keda detenido pa cuatro dia pa motibo di a skirbi un graffitti riba un estatua, algo cu por a drecha masha facil y lihe, mientras cu destruccion cu lo dura añas pa por recupera ta bay sin mayor castigo.
Reaccion minister di Naturalesa
Bon Dia Aruba a acerca minister di Naturalesa, Ursell Arends pa puntra si e tabata na altura di e suceso aki. “Nos a tuma nota di e destruccion cu a ser haci na nos naturalesa. Esaki ta un tereno cu ta califica como natuurgebied y a ser rosa sin permiso y sin ontheffing,” el a bisa. “E ta lamentable pa wak con nos propio hendenan ta causa destruccion, pero mas ainda di ta pensa cu nan ta riba ley. Ley ta conta pa inversionista y pa local. Ley ta conta pa tur hende, nos niun no ta riba ley,” Arends, kende tambe ta minister di Integridad, a enfatisa. “E departamentonan di gobierno ta atendiendo e caso aki, y ministerio di Naturalesa ta sigui esaki di cerca.”
Igualmente, Arends a atende e caso aki durante su conferencia di prensa ayera. Contestando pregunta tocante e caso di Embassy Suites, unda a indica cu actualmente ta procesando nan solicitud pa ontheffing, Arends a comenta: “Durante weekend mi a tuma nota di un otro sucedido den un natuurgebied cu a tuma lugar. E tin nos atencion. E departamentonan di gobierno a cuminsa mobilisa pa haya informacion concreto kico ta tumando lugar. Y mi mester bisa cu hopi biaha nos ta critica sector turistico, critica desaroyadornan, pero tin ora ta nos mesun hendenan ta haci daño, sin tin informacionnan adecuado, sin cana e caminda legal, cana e proceso manera mester ta. Anto bo ta wak awo cu ta cuestiona si ta gobierno ta permiti pa rosa tereno cu tur esakinan.” El a bisa cu ta considerando pa bin cu un campaña di conscientisacion tocante e proceso pa con mester yega na un aanlegvergunning of yega na un ontheffing, no solo pa desaroyadornan sino tambe pa localnan pa asina nan sa cua ta e proceso cu mester cana prome cu yega pa rosa un tereno.
Finalisando, el a sigura cu no solamente departamento di Naturalesa, sino otro departamentonan di gobierno tin nan atencion riba e caso aki y cu nan lo sigura cu e procesonan necesario wordo cumpli.
