Manera ya caba a keda publica den nos edicion di ayera, Hulanda no kier solucion pa supervision financiero via landsverordening di Aruba. Prome Minister, Evelyn Wever-Croes, a bay Hulanda pa presenta e propuesta di Aruba pa amienda den e ley local pa supervision financiero (LAft), pero Hulanda no a aproba e propuesta aki.

E propuesta di Prome Minister tabata enfoca ariba un supervision financiero di un forma hibrido, cual ta un combinacion di e landsverordening (LAft) y un version mas simpel di e ley di Reino (Rijkswet).

Segun e portal online Aruba.nu a indica, Prome Minister a purba di convence Hulanda door di ofrece, entre otro, pa inclui normanan presupuestario den LAft y pone limite riba gasto di personal. Pero pa Hulanda, door cu Parlamento di Aruba por haci cambio unilateral na un LAft, no tin confiansa pa e sostenibilidad di e sorto di propuestanan asina. Pa e motibo aki, gobierno Hulandes ta insisti pa garantisa e normanan presupuestario pa Aruba a traves di un ley di Reino.

Gobierno di Aruba algun luna pasa a traha riba algun cambio pa e LAft pa actualisa e normanan anticua den e LAft y a manda esaki dia 31 di augustus pa BZK pa e wordo trata, segun Wever-Croes. Prome Minister a expresa cu Gobierno tabatin e speransa cu e cambionan lo a wordo aproba den e reunion di diabierna den Conseho di Minister di Reino, pa asina e por mand’e Parlamento pa e wordo trata prome cu e periodo di 6 siman di reces di Parlamento, pa asina cambionan drenta na vigor pa 1 di januari 2024.

Sinembargo, Prome Minister a expresa, na ultimo momento, esta diamars, cu Hulanda a bin cu tres condicion nobo. Wever-Croes no a duna ningun detaye kico precies e condicionnan aki por ta, solamente indicando cu diaranson Gobierno di Aruba a hiba combersacionnan cu Secretario di Estado, Alexandra van Huffelen riba e condicionnan aki. Secretario di Estado Van Huffelen mes no tabata presente den e reunion di Conseho di Minister di Reino diabierna pa motibo di compromisonan na Boneiro. Presente na su luga tabata Minister di BZK, señor Hugo de Jonge cu kende tambe Prome Minister ta den contacto.

E tema di LAft y RAft ta keda uno di suma importancia pa Aruba y ariba e tema aki team di Bon Dia Aruba a tene un entrevista cu lider di Partido Red Democratico, Ricardo Croes, y ex Minister di Enseñansa, Rudy Lampe, ariba e tema aki pa nan ofrece nan punto di bista como partido den oposicion ariba e topico aki.

Sr. Croes a remarca cu for di su punto di bista e no ta nada straño cu Conseho di Minister di Reino a dicidi di rechasa e propuesta cu Prome Minister di Aruba a presenta. “Tur hende den e tereno politico na Aruba por a anticipa cu esaki ta e caso. Tabatin condicionnan poni caba cu Prome Minister a dicidi di bypass y na final costando Aruba centenares di miyones na interes extra, den un tempo precario manera cu nos tin aworaki,” Croes a bisa.

El a resalta cu e hecho cu Prome Minister a bay Hulanda, sabiendo cu Secretario di Estado, Alexandra van Huffelen no tey presente pa atende tampoco, ta un acto cu nan ta haya un poco straño, mirando cu negociacionnan ariba e tema tabata sucede, den su mayoria, entre Secretario di Estado van Huffelen y Prome Minister Wever-Croes.

Croes a señala cu aworaki Prome Minister ta indica cu nan ta negoshando cu otro banconan pa nan haya e prestamo na un interes mas abao, cu no lo mester supervision financiero na Aruba pasobra gobierno mes por maneha finanzas di Aruba y cu e un Rijkswet ta atacha e autonomia di pais Aruba.

“Tur esaki ta un circo politico pasobra nos tur sa e berdad y e berdad ta cu e maneho financiero ta desastroso, nos no ta prepara pa niun calamidad, Hulanda ta pone finanzas disponibel, Hulanda ta consciente di e maneho deficiente y e no ta nenga di yuda, pero e ta bisa mi ta yuda pa percura pa e placa disponibel ta yega na e destinonan cu e tin cu yega,” el a indica.

Sr. Lampe ta expresa cu for di su punto di bista, e hecho cu Prome Minister di Aruba a bay e reunion cu Conseho di Minister di Reino sin presencia di Secretario di Estado van Huffelen ta un paso intencional pa cuminsa prepara e scenario pa bisa cu nan tin cu busca un otro instancia pa fia Aruba e placa na interes mas abao. “For di inicio segun mi esey tabata nan intencion,” el a remarca.

El a señala cu pa hopi decada AVP y MEP ta hunto den un negoshi cu e debe di pais Aruba. El a resalta cu hopi hende a keda straño cu AVP a sostene MEP den henter e asunto di RAft, pero el a apunta cu ta pasobra e negoshi di AVP y MEP ta hinca den esey y pa decadanan e partidonan aki ta aumenta e debe di pais Aruba.

E ex minister a splica cu Aruba a keda para riba cu nan no kier e RAft di Corsou y Sint Maarten pasobra Aruba ta e unico isla den Caribe Hulandes cu tin Status Aparte cu por bay fia riba mercado internacional, Corsou y Sint Maarten no tin e autoridad ey.

Si lo a hinca Aruba hunto cu Corsou y Sint Maarten bao di un RAft, esaki lo tin como consecuencia un dado momento cu Aruba ta haya mesun condicionnan cu Corsou y Sint Maarten. Locual Aruba no kier pasobra e kier mantene e autonomia financiero pa e por bay riba mercado internacional.

Segun Lampe ta señala, e motibo di esaki ta pasobra ora cu analisa e situacion, pa Aruba por haya fiansa riba mercado internacional e mester di aprobacion di Conseho di Minister di Reino y, segun el a sigui indica, aworaki MEP y AVP a inventa un sistema pa bypass esaki. Y e manera con ta bypass e aprobacion di Conseho di Minister di Reino, segun Lampe a señala, ta cu nan ta bisa cu e prestamo ta local, pero mientras tanto ta placa cu ta bin di afo.

“Banco Central y e banconan local ta participa den e wega y tur ta haya un comision y nan ta stempel e placa local y asina a bypass e aprobacion di Hulanda. Y ta cos cu a bin ta pasa caba, pa decadanan y p’esey MEP y AVP ta hunto den esaki. Aworaki Prome Minister ta bezig caba ta negoshando cu gruponan financiero cu a ofrece 5% di interes, inclusive tin grupo cu a ofrece 4% di interes. Di unda e placa ta bin y por tin duda pasobra ta capitalnan grandi y ta un negoshi grandi,” el a subraya.

For di e punto di bista di Parido Red Democratico, Prome Minister ta preparando e scenario pa despues bende na pueblo di Aruba cu nan a haya un grupo financiero cu ta ofrece un interes mas abao pasobra Hulanda a bolbe nenga di acepta nan propuesta.