(NLTimes) – Un den cada 3 institucion pa cuido di salud mental a experiencia perdida aña pasa. Segun Intrakoop, cual ta monitor e finanzas di e sector di salud mental anualmente, 35 porciento a cera e aña den cora, dobel e cantidad di e aña anterior. E resultado di e institucionnan cu ta bon financieramente tambe a empeora. E investigadornan ta credita esaki na aumento significante den costo.
“Aumento di gasto den personal a causa di e mercado di labor preta, falta di empleado sumamente halto y gastonan di energia sumamente halto a laga atras un impacto,” Intrakoop a resumi. En total, e 166 organisacion cu a participa den e encuesta a reporta un resultado di financiero di 66 miyon euro, compara cu 216 miyon euro den aña 2021.
Organisacion Hulandes pa cuido di salud mental GGZ a adverti cu cuido di salud Hulandes ta “cayendo.” Segun e presidente, Ruth Peetoom, e tarifanan paga actualmente ta “completamente insuficiente” y ta perhudica e ayudo cu ta brinda na hendenan cu tin problemanan psicologico compleho manera schizofrenia of desorden alimenticio. “E tarifanan pa e cuido compleho aki, en particular, ta inadecua.”
Director di Intrakoop Ruud Plum tambe ta haya cu e resultadonan aki ta preocupante. “Loke ta preocupa mi mas ta e grupo meymey grandi y e organisacionnan grandi di salud mental ta experenciando problema.” No tin fin den bista na e lucha aki pa motibo cu e costonan ta keda aumenta a causa di inflacion. Gastonan den salario tambe lo aumenta mas ainda. Segun e acuerdo colectivo di labor cu a yega anteriormente, e empleadonan tin derecho na 2 aumento di salario, cuminsando cu 5 porciento den November di e aña aki y otro 2 porciento den januari.
Mayoria institucion por cubri nan gastonan den termino corto, sinembargo e situacion no ta sostenibel segun e asociacion. “Ki ora e municipalidadnan, seguronan di salud y oficialnan di cuido di salud lo tende e batimento di alarma aki? Accion ta necesario awo,” Peetoom a declara.
