Pero esaki no a yuda baha gasto di personal di gobierno

Recientemente a traves di un comunicado di prensa, prome minister Evelyn Wever-Croes a duna un update di e resultado di e maneho di integracion di ambtenaarnan no activo den aparato gubernamental. Den esaki, el a informa cu e cantidad di 82 empleado cu tabatin den e ‘overtolligeheidspoule’, solamente 9 ta no activo ainda.

Segun e comunicado, desde di comienso di gobernacion di Gabinete Wever-Croes, a constata un cantidad di ambtenaar no activo, ‘overtolligheidspoule’, den e aparato gubernamental. Gobierno inmediatamente a tuma pasonan concreto pa yega na solucionnan cu ta realisabel pa asina drecha e situacion aki.

 

E categoria di ambtenaarnan no activo tabata un reto enorme cu a costa Gobierno un total di 7 miyon florin pa aña. Esakinan ta ambtenaarnan cu a wordo manda cas mientras nan tabata wordo paga. 82 ambtenaar tabata den e categoria aki. Gabinete Wever-Croes desde e principio di gobernacion no a acepta cu mester paga hende mientras nan no ta trahando siendo cu tin cu baha gasto di personal. Cu e maneho di Gabinete Wever-Croes, a logra baha e ‘overtolligheidspoule’ aki y e deseo sigur di Gobierno ta cu esaki ta yega na 0.

 

Prome Minister Evelyn Wever-Croes a duna di conoce cu na fin di aña pasa, Gobierno a anuncia un maneho nobo relaciona cu maneho di e grupo di empleadonan publico cu no ta activo. E maneho aki ta enfoca riba un buskeda mas activo pa funcionnan adecua pa e empleadonan cu no ta activo. Den e contexto aki, e empleadonan cu no ta activo mes ta keda responsabel pa nan propio proceso di reintegracion y nan lo ricibi guia di Departamento di Recurso Humano (DRH) durante e proceso aki.

 

E proceso di reintegracion ta tuma 12 luna. Den caso cu un empleado no activo no kier colabora cu su reintegracion of cu e asistencia ofreci, lo tin consecuencianan negativo (Por ehempel: lo por inicia un proceso disciplinario of retiro). Segun e maneho aki, si e reintegracion no ta exitoso dentro di e termino di 1 aña, por duna retiro na e empleado publico.

Di e 24 (IPV20) empleado cu no ta activo cu a keda, segun e comunicado tin nuebe cu ainda ta buscando un funcion adecua den aparato publico; diesun cu ta keda oficialmente aloca den un servicio di gobierno; un cu a haya retiro; y tres cu ta ‘on hold’ (arbeidsongeschikt, disciplinair traject, gedetineerd).

 

Segun e comunicado di gobierno, e cifranan aki ta importante pa ilustra cu e maneho di Gabinete Wever-Croes pa baha gasto di personal a conduci su mes na solucionnan concreto pa logra baha cantidad di empleado publico no activo. Prome Minister a enfatisa cu Departamento di Recurso Humano ta haciendo tur posibel pa haya solucion pa e 9 empleadonan publico cu ainda ta den ‘overtolligheidspoule’ y alabes ta gradici nan pa logra baha e cantidad di empleadonan publico cu ta no activo y asina tambe tin miho maneho den cuadro di Organisacion Gubernamental.

Asina mes, gasto di personal a aumenta

Manera Bon Dia Aruba a publica dia 22 di october, durante conferencia di prensa di CAft, Bon Dia Aruba a puntra, mirando cu aña pasa a pone hopi enfasis riba reduccion di gastonan di personal di gobierno di Aruba, si CAft a mira algun tipo di progreso den esaki.

Presidente di CAft, Lidewijde Ongering a contesta cu den e ultimo rapport di implementacion por a nota cu e gastonan di personal en realidad a keda aumenta, pues ta keda un reto. Tin un norma di gasto di personal pa e pais, cu ta indica cu e mester keda baha di un aña pa e siguiente, pero ta keda un reto pa Aruba por cumpli cu esaki debidamente.

Na juli ultimo, Bon Dia Aruba a publica un articulo titula “Deficit di gobierno a bira surplus den prome kwartaal di 2023; pero gasto di gobierno a aumenta,” den cual a destaca con den su Quarterly Bulletin mas recien pa 2023, publica e luna aki, Banco Central di Aruba a nota cu e deficit di gobierno a bira surplus den prome kwartaal, na mes momento cu gasto total di gobierno tambe a aumenta cu Afl. 20 miyon principalmente pa aumento den salario y bienes y servicio. E dos area aki ta uno riba cual Hulanda a pone hopi enfasis como un di e puntonan mas importante di atencion pa reforma na Aruba.