Manera a bira conoci den ultimo dianan, hues di corte di prome instancia a haya cu accionnan cu ex-minister plenipotenciario, Guilfred Besaril no ta hacie apto pa traha ni como polis ni como funcionario publico mas. Un minister cu a keda envolvi den otro caso di malversacion di fondo y cu ta uni na e lista di esnan cu ya caba a mancha e politica di Aruba.
A entrega keho penal contra Besaril
Pa esaki, redactor di Bon Dia Aruba den un ultimo conferencia di prensa di Gobierno di Aruba a puntra prome minister, Evelyn Wever-Croes si nan a entrega un keho penal contra Besaril na Landsrecherche pa loke el a haci mientras e tabata den su funcion como minister plenipotenciario na Hulanda. Den e caso aki, un hues di corte di prome instancia a señala cu el a comete infraccion grave pa loke tabata su deber y for di su actuacion a surgi duda tocante su integridad.
Prome minister su contesta tabata cu “e caso di Besaril ya caba ta conoci y despues di a bay Parlamento di Aruba y duna amplio splicacion di e caso aki, algo cu nunca antes a pasa na Aruba, e grado di transparencia asina grandi, un keho a wordo entrega na Landsrecherche e tempo ey caba.”
Politiconan condena pa corupcion na Aruba
Aruba tin record den reino di politiconan condena pa hechonan castigabel, incluyendo ex-minister di Finanzas, Tico Croes bao di gabinete di Henny Eman III pa loke tabata trata Fondo di Desaroyo Nobo San Nicolas su sentencia (onherroepelijk).
Ex-minister Paul Croes, cu tabata minister di Hubentud, Asuntonan Social y Labor den Gabinete Mike Eman II, tambe a keda condena penalmente den e caso IBIS pa diferente delito manera labamento di placa, participacion den un organisacion criminal, acepta y pidi soborno y abuso di su funcion. Paul Croes su sentencia ta tambe ta onherroepelijk y na e momentonan aki ta pagando su debe cu husticia di Aruba na KIA.
Benny Sevinger, parlamentario y ex-minister di Infrastructura, Integracion y Medio Ambiente den Gabinete Mike Eman I y II, ken a keda condena den corte di prome instancia den e caso Avestruz pa otorgamento di tereno di gobierno y mal uso di su fundacion Curason Berde, su sentencia ta den apelacion.
Alan Howell, ken tabata e sospechoso principal di e caso Diamante y tabata fungi como vice-presidente di Parlamento di Aruba, tambe a keda condena pa malversacion di fondo y falsificacion di documento.Aworaki su sentencia ta den apelacion. Conhuntamente cu Howell, Jacqueline van Putten, ken tabata candidato riba lista y tabata tesorera di e fundacion di fraccion di partido POR den Parlamento di Aruba, cu ta yama Blue is Love Foundation, den sentencia ta indica cu Van Putten a enrikece su mes cu Sinterklaas bonus cu e no tabatin derecho riba dje. Van putten no a apela su sentencia, loke ta hacie onherroepelijk.
Politiconan sospechoso di husticia na e momentonan aki
Ex-minister di Infrastructura y Medio Ambiente di Gabinete Wever-Croes I, Otmar Oduber, na momentonan aki ta sospechoso den caso Flamingo relaciona cu otorgamento di tereno.
Chris Romero, ex-minister di Transporte y Sector Primario di Gabinete Wever-Croes I, tambe ta sospechoso penal den e caso Kwihi pa algun contract di servicio otorga den su funcion como minister.
Y awor e caso di Guilfred Besaril, ex-minister plenipotenciario di Gabinete Wever-Croes II na Hulanda, contra ken segun prome minister ya caba un keho penal ta canando su caminda. Cu esaki por mira cu no ta dos minister so cu condena penalmente, manera prome minister a sigura.
Pero kico Gobierno di Aruba ta haciendo pa preveni cu casonan asina sigui tuma luga?
Pa esaki, prome minister a expresa cu “cada un caso e ta di mas. E gobierno aki for di prome gabinete caba nos a pone integridad front and center di nos den gobernacion. Ora nos a drenta den gobierno aña 2017, papia di integridad tabata casi un palabra malo den gobernacion, den departamentonan y institutonan di gobierno. Nos a cambia esey, nos a duna tur hende e confiansa back cu integridad no ta algo cu ta un palabra malo, no, e tin un direccion pa bay. Den e prome gabinete e ora nos a traha un vision riba e integridad, nos a bin cu Bureau Integriteit y mi mes a lidera e procesonan ey. Nos tin Bureau Integriteit awe cu ta un instituto cu mi ta sumamente orguyoso di dje cu ta atende kehonan di kiebro di integridad cu tur empleado publico y esnan cu no ta traha den aparato publico por yama y entrega nan kehonan. Aparte di esey, nos a bin cu diferente nota di maneho, nos a bin cu por ehemplo Corporate Governance cu nos kier pa bin cu mas reglanan den structura di companianan estatal pa loke ta trata integridad,” el a sigura.
Den e prome gabinete Wever-Croes manera el a sigura, door di pandemia Covid-19 tambe tin hopi cos cu no por a realisa. “Y den nos di dos gabinete nos a haya un partner den coalicion cu ta carga e bandera di integridad cu mes of hasta mas pasion cu nos mes, y cu kier a tuma esey over y nan ta haciendo un tremendo trabao di dje,” segun Wever-Croes.
Pues, cu Bureau Integriteit, comision di Corporate Governance a prepara hunto cu gobierno e propuesta cu pronto lo bira hasta un ley den cual nan ta hancra un ke otro den diferente sentido. “Nos a bin cu hopi mas regla, proceduranan, pa nos proteha y percura cu tin integridad den gobernacion y nos ta solo nos ta bin cu reglanan pa bisa si ta aplicabel riba otronan. No, nos a demostra contrario na esnan prome cu nos, ora bo kibra regla di integridad e tin consecuencia pa bo, ni con cerca bo ta, ni con stima bo ta, ni cuanto aprecia bo ta, integridad ta un linea cu ora bo cruc’e, ba cruc’e. Y e ora bo tin cu carga e consecuencianan. Esey ta algo cu nos ta bisando desde prome dia y nos ta bin trahando conforme cu esey tambe. Cu esey mi ta kere cu dunando ehempel bo ta logra hopi mas cu simplemente papia di cosnan sin implementa nan. Den e caso aki nos ta haciendo tur dos, kiebro di integridad ni con fuerte ni con pisa, e tin consecuencia,” prome minister a splica.
Siguiendo e linea aki, tambe a puntra prome minister si den futuro lo tin un ley pa esnan cu a keda condena pa hechonan castigabel, pa evita nan di bay riba un lista politico. Su contesta tabata cu den nan maneho y den ley actual cu ta conta caba pa minister, ta poni cu na momento cu e persona bira sospechoso, e tin cu baha di su funcion. E ta un ley cu segun prome minister a afirma, nan a bin cune, un ley di iniciativa cu ta conta pa tur minister.
Pa loke ta trata parlamento, nan mes mester traha e ley. Prome minister a señala cu nan ta un instituto autonomo. “Ni cuanto cu nos kier, nos no por hacie. Ademas ta algo cu tin cu hancra den Constitucion. Den parlamento nos Constitucion ta stipula ken nan ta eligibel pa drenta parlamento. Nos tin ehempel di parlamentario Benny Sevinger cu ya caba a haya condena den prome instancia y ta wardando su apelacion unda e ta miembro di parlamento ainda, y mi ta sigur cu tin hopi hende den parlamento cu no kier esey y hopi hende pafo di parlamento cu tampoco kier esey. Pero lamentablemente esey ta reglanan cu anos di Gobierno no por impone riba nan, parlamento ta esey cu tin cu atende cune,” el a finalisa.
Nota di redaccion:
Na Aruba: Na e momento aki tin 4 politico condena penal pa corupcion.
Na Corsou: Tin 2 politico condena pa corupcion y 1 pa asesinato di Helmin Wiels.
Na Sint Maarten: Tin 2 condena na e momento aki pa corupcion.
Partido AVP: Na e momento aki tin 3 condena pa corupcion.
Partido POR: Na e momento aki tin 2 politico condena pa corupcion y 1 sospechoso di husticia na e momento aki den caso Flamingo.
Partido MEP: Tin 1 sospechoso di husticia na e momento aki cu ta den caso Kwihi y NO oficialmente tin un keho penal contra ex-minister plenipotenciario Guilfred Besaril segun prome minister a sigura; pero Ministerio publico te ainda no a pronuncia ningun caminda oficialmente cu Besaril ta sospechoso di husticia.
