Dia 13 di october Aruba a ser conoci cu un bos nobo, esta Nigel Maduro, ora a publica den medionan di comunicacion cu e hoben di 27 aña a ser deteni pa e acto di vandalismo den cual a sospecha cu el a pinta “NO MORE HOTELS” riba e plataforma di e monumento nobo “Mama Driekiel” situa na Eagle Beach. Bon Dia Aruba a sinta cu Nigel e siman aki pa asina conoce mas di su trayectoria como activista y tocante e suceso recien cu a causa un movemento riba red social.

Nigel a conta nos reportero tocante su comienso den e tereno di activismo, cual a tuma luga na 2019. Su trayectorio a cuminsa ora el a bay muda pa un temporada na New Zealand, unda el a haya un trabao na e organisacion ambiental Green Peace, den cual el a funciona como un People and Culture Coordinator. Nigel a conta cu durante su tempo trahando cu e organisacion el a siña di e strategianan di e organisacion pa aboga pa medio ambiente y derecho humano. Asina tambe el a cuminsa tuma iniciativa pa sigui siña pa asina trece su conocemento y experencia di abogacia na Aruba.

Nigel a enfatisa cu su trabao na Green Peace a pasa pa casualidad. E tempo ey, e tabata den su di cuatro aña den su estudio Bachelor den International Human Resource Management na Saxion University of Applied Sciences y a tuma un break pa asina por reconecta cu su mes. Pa esaki, el a dicidi pa tuma e riesgo y muda bay te na New Zealand, unda por bisa cu el a haya su yamado na Green Peace: “Bida ta hibando mi kinan…take it.”

El a protesta den diferente manera cu e organisacion y despues di a muda bek na Hulanda, su abogacia no a caba, sino cu el a sigui den un otro forma: riba red social y den forma academico. Nigel a haci un estudio Master’s den Strategic Leadership Towards Sustainability na Blekinge Institute of Technology, pa cual el a logra haya su diploma e aña aki.

Durante e tempo cu e tabata na New Zealand, el a cuminsa sinti mas conecta cu su herencia indigena Rubiano. Manera el a splica, su identidad como Rubiano y aparencia diferente na Hulanda a haci’e hiper-consciente di su identidad Rubiano. Esaki a intensifica mas ainda ora el a bay biba na skina di mundo, pues New Zealand, leu di tur familiaridad Rubiano. Eynan ta unda el a compronde e importancia y orguyo di su herencia, specialmente loke ta e parti indigena cu na Aruba no ta ser explicitamente reconoci of celebra.

Pa loke tabata e incidente cu a tuma luga algun siman pasa, e activista a splica cu tabatin tres motibo cu a resulta ultimamente den e evento cu a sosode fin di september, den cual tur tres el a ripara e daño na e ecosistema- y lamanan di su infancia of e tratamento inhusto di localnan pa acceso na nos naturalesa. Nigel a splica su sentimentonan pa cu esaki, bisando cu “esaki tabata mi ‘roots’, y el a djis disparce.”

Pa loke tabata e pida arte cu el a laga na e estatua di driekiel, el a bisa cu e tabatin e intencion pa haci esaki aki, pa asina e por causa un reaccion for di pueblo: “Na hotelnan mi no ta haya ningun reaccion, pero si mi haci’e kinan, […] e ora hende lo papia.” Pues el a coy su flit y a skirbi: NO MORE HOTELS. Cu esaki e kier a enfatisa e mensahe di e driekiel mas claro: “Nobody’s getting the message: mi a djis pone un mensahe riba e mensahe.”

Despues di e incidente aki, un ola di reaccion a surgi riba red social, specialmente Facebook, unda hopi hende a duna nan comentario tocante e pida arte y e situacion di hotelnan na Aruba. Di su banda, Nigel a conta cu e reaccionnan tabata polarisante: “Hopi critica, obviamente. Hopi cambio di narativo. Hopi hende a rabia cu e tabata par di letter cora cu nan a verf [back] den menos cu 12 ora.” Tambe el a enfatisa cu hopi hende a comparti su mesun sentimento, bisando cu el mira algun potret di otro arte di graffiti cu no tabata di dje mes: “mas hende kier pa nan bos ser tendi”.

 Tambe a puntra Nigel di su experencia den detencion, y pa comparti su banda di e storia. Pa esaki el a revela cu e autoridadnan tabata sospecha caba cu e tabata nan sospechoso, y pa motibo di metodonan uza contra su persona, Nigel a bisa cu e no tabata kier pa nan “get the win”, pues el a entrega su mes dia 10 di october. Den su interogacion, Nigel a enfatisa cu el admiti tur cos cu el a haci y e motibo pakico el a haci’e. Pa e acto aki, Nigel a keda 3 dia deteni, den cual el a enfatisa cu e mester a keda dos dia en principio, pero autoridadnan a extende pa motibonan no revela su detencion cu un dia mas.


 Ora a puntr’e si e situacion aki a inspir’e pa sigui su activismo na Aruba, el a subraya cu “absolutamente” e lo sigui cu su activismo. Pero el a enfatisa cu e lo sigui den manera legal, enfatisando cu e acto di vandalismo riba e plataforma di e driekiel tabata algo cu a haci cu intencion: “Esaki [tabata] e ‘punk way’, pero mi por haci’e sabi.”

 Pa clausula e entrevista, nos reportero a puntra Nigel si e tin un delaster mensahe pa awo, pa cual el a enfatisa cu e situacion aki no ta algo politico, pero e “bigger picture” ta cu esaki ta trata di e bienestar di nos isla. Tambe el a enfatisa cu tur hende por ta activista den nan mesun manera, manera via arte, sticker etc.: “Tur hende tin un palabra pa bisa of un accion pa haci.” E kier conscientisa pa pueblo tambe uza nan stem, ya cu “poder ta bin den cantidad.”