Grupo organisando Marcha Pro Famia kier pidi Gobierno y Parlamento pa sostene famia tradicional

Ayera durante un conferencia di prensa cu diferente medio di comunicacion local, un grupo di ciudadano a anuncia cu nan ta organisando un marcha pro famia, pa vocifera nan punto di bista ariba loke ta trata e ley di matrimonio di mesun sexo na Aruba.

E ciudadanonan primeramente a enfatisa cu e marcha aki no ta algo religioso, pero mas bien nan kier pone religion un banda y nan kier trece informacion pa comunidad. E marcha aki ta yama “Pro Famia” y lo tuma luga dia 3 di december saliendo for di Citgo Boulevard direccion pa Bestuurskantoor, unda e grupo lo presenta e enfoke di e marcha, cual ta bringa pa famia segun e diseño di Dios.

“Mi ta kere ta importante pa compronde cu e legalisacion di e ley pa matrimonio di mesun sexo ta bay hopi mas leu cu djis dos persona di mesun sexo casa cu otro,” nan a expresa.

Nan a recorda un respuesta importante cu Minister Geoffrey Wever a duna ariba e pregunta di kicoxhv  lo pasa cu e muchanan, kico lo pasa na e scolnan y si e muchanan lo wordo siña, indoctrina den e area aki, na cual Minister Wever a bisa sigur cu si, cu esaki ta algo cu tambe lo bini hunto cu e ley di matrimonio di mesun sexo.

“Mi ta kere awe nos kier yama na atencion di comunidad di Aruba cu esaki ta algo hopi serio, esaki ta algo cu ta bay tin un consecuencia pa nos muchanan. Mi ta kere cu si esaki cuminsa drenta e scolnan, loke e ta bay haci ta cu nos yiunan ta bay wordo siña e temanan aki, ideologia di genero y loke nan ta yama amor, y mi ta kere cu esaki Aruba no ta prepara p’e,” nan a bisa,

Pa e motibo aki ta preparando e marcha Pro Famia.

Nan a enfatisa cu nan kier laga atras un punto hopi importante, cual ta cu nunca un grupo a lanta contra homosexualidad, contra lesbianismo, e grupo LGBTQ y nunca a haci guera contra nan, den pasado.

Nan a remarca cu e marcha aki no ta nifica cu nan ta lantando contra di nan. Nan a subraya cu locual nan ta haciendo aworaki ta lantando Pro Famia, pa conserva famia y pa famia permanece manera Dios a diseñ’e.

“Pa es motibo nos ta bayendo bestuurskantoor pa pidi Gobierno, pa pidi e Parlamentarionan cu nos kier mantene e famia manera Dios a diseñ’e,” nan a resalta.