Minister di Finanzas, Xiomara Maduro: “Retraso di Uitvoeringsrapportage ta debi na decision cu mester atende entre otro, caba cu cuentanan anual di 2019”

Dialuna ultimo, a tuma luga un conferencia di prensa extraordinario di Gobierno di Aruba, durante cual a anuncia e maneho financiero cu a duna como resultado 25 miyon florin extra den e di dos presupuesto complementario. Sinembargo, tin rapportnan financiero cu a haya retraso y cu mester ta publica caba for di luna di mei, manera esun pa di dos kwartaal.

Pa esaki, minister di Finanzas, Xiomara Maduro a splica cu ta corecto cu tin un retraso den e Uitvoeringsrapportage unda cu tur kwartaal nan ta reporta riba e parti financiero di ehecucion di presupuesto di e aña corespondiente. “Ta asina’ki cu e aña aki nos a publica esun prome caba cu un retraso den dje. Esun di dos lo sali probablemente na fin di october of den november. E retraso grandi ta debi na decision cu nos mester a tuma pa asina por atende entre otro, pa por caba cu locual ta e cuentanan anual di aña 2019,” el a bisa.

Manera ta conoci, nan no por cera e ciclo presupuestario di aña 2019 y esey ta trece cune tambe cu no por sigui traha riba e otro añanan y mester yega eynan pa por cera e ciclo “p’esey decision mester a ser tuma di unda nos mester concentra e energia y esaki tin di haber cu e hecho di e realidad cu gobierno ta traha cu un plug di personanan cu ta e mesun grupo di hendenan cu tin cu atende cu e negociacion cu Hulanda, cu tin cu atende cu supervision financiero cu trabounan di Landspakket y tambe cu cuentanan anual di Pais Aruba y reportahe di kwartaal, p’esey mester a tuma un decision y esaki tambe puntonan cu nos a hiba den e reunion cu nos tabatin cu CAft siman pasa, aunke cu no tin e kwartaalrapportage si tin e cifranan di e lunanan manera cu esaki ta ser cera nan tin loke ta yama e maandrapportage, nan tin e cifranan unda nan por tin un bista di lo cual cu ta e ehecucion di presupuesto 2023 y p’esey tambe CAft no a haci un hecho grandi di dje, pa motibo cu nan ta informa si di e parti financiero via di maandrapportage.” Minister Maduro a menciona.

Den un comunicado di prensa, Gobierno di Aruba a informa cu diabierna siman pasa prome minister Evelyn Wever-Croes a reuni cu CAft, cu ta e colegio di supervision financiero, cu ta bin cada tres luna pa duna Gobierno nan punto di bista, riba e desaroyonan financiero di pais Aruba. Prome minister a expresa di ta sumamente satisfecho cu e reunion, mirando cu representantenan di CAft tabata hopi positivo riba e crecemento economico, riba e desaroyo di turismo, riba e finanzas publico, riba e pronostico y proyeccionnan cu tin pa pais Aruba.

Durante e reunion, prome minister a splica CAft cu pa Gobierno ta importante mirando cu e indicadornan macro-economico ta asina positivo, pa e progreso y bienestar ey drenta den tur hogar di pais Aruba. Gobierno lo kier enfoca riba e preocupacionnan cu tin actualmente, cu ta pobresa, problema social, cuido, y enseñansa. Mirando e situacion economico positivo, lo desea di haci inversionnan de e areanan aki. Riba e punto aki, CAft tambe a bay di acuerdo.

“CAft: Economia lo crece 8%”
Di su parti, CAft tambe a informa cu Economia di Aruba ta creciendo considerablemente desde 2021. Na 2023, segun e ultimo cifranan di Fondo Monetario Internacional (IMF), economia lo crece cu 8 porciento.

Pa 2024 ta spera un crecemento di 3 porciento. E recuperacion fuerte aki, compaña cu medida fiscal, ta traduci den entrada di belasting y di prima substancialmente mas cu lo locual tabata presupuesta. E entradanan inespera ta considerabel, tanto pa pais como pa otro entidad di sector colectivo. Importante ta pa Aruba gara e momento pa pone finanzas publico structuralmente na ordo y haci e economia mas resiliente. Esey por logra door di hiba un maneho presupuestario prudente, usa entrada inespera pa reduci e debe publico (83 porciento di e PIB na 2023) y haci inversion cu ta fomenta crecemento. Reforma structural den salubridad y siguridad social tambe ta aporta na mas resiliencia.

A presenta e proyecto presupuestario pa 2024 na tempo. Esaki ta reforsa derecho presupuestario di Parlamento. Sin embargo, contrario na e ciclo presupuestario, tin retraso pa loke ta trata informacion tocante ehecucion y dunamento di cuenta. Ta premira cu entrada inespera den 2023 lo haci impulso di e surplus financiero di sector colectivo mucho mas cu e norma di 1 porciento di e PIB. E posicion financiero ta faborabel riba corto plaso, pero tin riesgonan considerabel. E gastonan di interes, cu ya caba tabata representa 16 porciento di e presupuesto, lo ta hopi mas cu locual a presupuesta. Esaki ta pa motibo cu e refinanciamento di e prestamo pa ayudo di likides ta mas caro. Como consecuencia, mas cu nunca e gastonan di interes ta desplasa otro gasto of inversion necesario, y control di gasto ta sigui ta hopi importante. Inversion ta necesario pa haci e economia mas resiliente y aumenta e capacidad pa genera entrada.

“Ta importante pa Aruba aumenta cumplimento fiscal”
Pa loke ta trata belasting, Aruba a tuma prome bon paso pa haci su sistema fiscal mas robusto cu e Plan Fiscal 2023. Sin embargo, e sistema di belasting indirecto ta keda fragmenta y door di esey innecesariamente compleho. Colegio di supervision financiero di Aruba (CAft) ta sigui encurasha, conforme e Pakete Nacional y e recomendacionnan di IMF, pa simplifica e sistema di belasting indirecto y introduci Impuesto riba Balor Agrega (IBA/BTW) riba corto plaso, manera anuncia anteriormente. Un sistema mas simpel tambe lo beneficia cumplimento fiscal. Ta importante pa Aruba aumenta cumplimento fiscal pa garantisa un distribucion di carga mas ekilibra y asina ey crea espacio presupuestario adicional pa mas inversion cu ta fomenta crecemento.

“Si no cambia maneho, e gastonan di cuido y pensioen di behes lo sigui aumenta”
Door di desaroyo demografico, si no cambia maneho, e gastonan di cuido y pensioen di behes lo sigui aumenta, locual lo genera deficit den futuro. Pa controla gasto den cuido di salud, Algemene Ziektekosten Verzekering (AZV) ta considerando un marco di gasto. En principio, CAft ta na fabor di un marco di gasto, di forma cu ora economia ta bayendo bon por acumula e surplusnan y esey por sirbi como reserva durante contratiempo economico. Sin embargo, ta importante cu e marco di gasto no ta demasiado amplio y cu ta aplica esaki solamente pa contene crecemento di gasto di cuido di salud.

Hustamente awo cu tin surplus enorme, CAft ta recomenda pa tuma medida, pa cuido di salud y seguridad social por sigui ta pagabel pa e generacionnan futuro.

Nota di redaccion: Den nos editorial di ayera 24 di october ta señala cu no por keda sin trata e retonan cu CAft ta señala y cu ta di suma importancia den e situacion actual. Gobierno di Aruba ta den un situacion bastante mas faborabel cu loke por a anticipa un aña pasa y cu esey, yega na suficiente entrada pa paga cuenta–sin baha gasto–ta bien posibel. Esey no por ta motibo pa laga e programa di reforma, cu mester ta den ehecucion hunto cu Hulanda, no continua mas.