Ricardo Croes: “Gobierno tin responsabilidad pa percura cu e derecho di su ciudadanonan ta wordo respeta”

Ayera mainta Partido RED Democratico a tene un conferencia di prensa na unda lider di e partido y ex-parlamentario, Sr. Ricardo Croes, a trece pa dilanti diferente tema y un di e temanan aki ta costo di bida na Aruba, un topico cu ta keda relevante pa comunidad.

Sr. Croes a elabora ariba e aspecto di nivel di subsistencia (betsaansminimum) na Aruba y con hopi famia ta bringa pa por subsisti cu salarionan cu no ta yega pa cubri gastonan esencial di tur luna.

El a indica cu na Aruba tin un salario minimo ancra den ley, cu ta un salario di 1.815,35 florin. Gobierno di Aruba a caba di anuncia cu ta bay aumenta e entrada aki cu 78,05 florin, locual ta representa un aumento di 4.3%.

El a remarca cu Central Bureau of Statistics Aruba (CBS) tambe a saca den luna di juli e aña aki un rapport cu ta papia ariba e nivel di subsistencia, kico un persona, of un famia cu ta consisti di varios persona, tin mester como minimo pa satisface loke ta e nivel di subsistencia.

Croes a splica cu segun CBS ta indica den su rapport, e nivel di subsistencia pa un famia na Aruba den juli di 2022 tabata 2.440 florin pa un adulto, 3.172 florin pa un adulto cu un yiu, 3.660 florin pa dos adulto, 4.392 florin pa dos adulto cu un yiu y 5.124 florin pa dos adulto cu dos yiu.

Pa luna di juli 2023 e sumanan aki a aumenta. Pa un adulto el a bira 2.540 florin, un adulto cu un yiu ta 3.302 3.17 florin, el a bira 3.810 florin pa dos adulto, 4.572 florin pa dos adulto cu un yiu y 5.334 florin pa dos adulto cu dos yiu.

Croes ta resalta cu si si compara esaki cu e salario minimo, locual hopi hende na Aruba ta conta cune como entrada, claramente e no ta yega y den comparacion cu e aumento di e salario minimo, e ta un diferencia di 10 biaha mas. Entre locual ta e salario minimo y locual ta e nivel di subsitencia minimo cu CBS ta conclui cu e mester ta, e ta 10 biaha mas grandi cu e aumento di entrada aki.

“Den relacion cu esaki, nos ta bao impresion cu gobierno ta traha pa robes pasobra un gobierno tin e responsabilidad pa percura cu e derecho di su ciudadanonan ta wordo respeta y di esakinan ta e nivel di bida di e ciudadano,” el a remarca.

“Gobierno ta prefera di subi su mesun gastonan, entre otro presupuesto 2024 cu 75 miyon florin, gobierno ta prefera di firma un acuerdo cu Hulanda pa paga un interes di casi 7% pa un total di casi 350 miyon florin, pero abo tin cu wak kico bo ta haci cu bo entrada, con bo ta lora, unda bo ta biba, kico e muchanan ta hiba scol, kico nan ta bisti, danki Dios tin uniform pero cuanto hende por pag’e?, schoolgeld cu ta halto, gasolin cu ta subi y asina mi por sigui. Pero gobierno si no tin niun problema cu esaki,” Croes a agrega.

El a referi tambe na un rapport cu a sali recientemente titula “Een Waardig Bestaan” skirbi pa sr. Glen Thode, presidente di e comision, Commissie Sociaal Minimum Caribesh Nederland. E investigacion aki a tuma luga pa averigua kico ta e diferencia entre e bestaansminimum di e islanan BES, Boneiro, Saba y Sint Eustatius, y Hulanda.

Den e rapport tambe, Croes ta splica, ta indica cu no solamente mester tene cuenta cu e nivel minimo di subsistencia, si no cu mester tene cuenta tambe cu e seguridad di existencia. Esaki ta encera cu un famia no por tin un entrada cu na momento cu algo repentino sucede e persona no por cubri e emergencia pasobra tur otro cos ta cay den otro.

El a agrega cu ta importante tambe pa e famia aki desaroya socialmente cual ta parti di salud social cu ta un aspecto importante pa un pais. “No ta asina tampoco cu e salario minimo por ta bao di bestaansminimum, pero e betsaansminimum tampoco por ta asina cu e no ta garantisa e seguridad di existencia,” el a bisa.

Croes a indica cu rapport aki a conclui cu den e tres islanan den Caribe, nuebe di cada 10 hogar ta biba cu gastonan cu ta surpasa nan entrada. El a añadi cu e investigacion di CBS pa Aruba y e rapport di e islanan BES no ta hopi leu for di otro y e conclusionnan ta hopi parecido.

“Pero kico gobierno ta haci? Gobierno ta subi belasting, gobierno ta subi su mesun gastonan, gobierno no tin niun vision, no ta crea niun pilar economico, no ta subsidia net nada den sector primario. Kico gobierno tin pensa di haci?,” el a remarca.

El a menciona cu sindicato SEPPA tambe a bin dilanti y tambe a trata e rapport di CBS y el a trece pa dilanti cu gobierno no kier papia tampoco ariba e aumento di entrada di ambtenaarnan.

El a sigui splica cu den sector priva tin dunadornan di trabao cu si ta subiendo entrada, a base di e hecho cu nan por, nan kier, nan ta consciente cu costo di bida subi. Pero el a enfatisa cu hopi hende ta pensa cu e solucion ta aumenta e salario minimo na e nivel di subsistencia y esey no ta corecto tampoco pasobra e dunador di trabao lo ta esun cu lo mester cay cu e extra peso aki.

“Dunador di trabao ta carga su gastonan a base di su entrada y e entradanan aki no ta duna pa e cuminsa cubri e gastonan aki sin mas. Kiermen e lo tin cu subi e prijs di su productonan, e prijs di su servicionan pa asina por haci esaki. Pero si e subi e prijs di su productonan of servicionan, bo tin e mesun cadena, e hendenan no por cumpra, e hendenan no por haci uso di e servicio. Kico ta locual gobierno mester haci,” el a cuestiona.