(EFE) – Un corte penal di El Salvador a condena cuatro traficante di persona cu castigonan di hasta 120 aña di prizon pa asesinato di un famia cu supuestamente nan mester a hiba pa Merca di manera iregular.
Asina e Organo Hudicial a informa dialuna ultimo, den cual a detaya cu e condenanan a ser duna pa Tribunal Segundo di Sentencia di Santa Tecla, municipio cerca di San Salvador.
“E coyotenan a acorda un pago di 13.500 dollar pa yuda e famia crusa e frontera di forma ilegal, famia a paga e mita di e placa y acorda di paga e otro mita ora nan lo a yega na nan destino,” e fuente a conta.
A conta cu e famia Tejada, componi di Medardo Enrique Tejada Portillo, Jenmy Selena Dubon Peña, Joshua Medardo Tejada Dubon y Francisca Zelaya, “a ser asesina pa coyotenan cu a priminti nan hiba nan Merca” dia 9 di october 2021.
“Dia di e tragedia, e coyotenan a busca e famia den oranan di marduga y a hiba nan na un tereno solitario na Canton La Shila, na Puerto de la Libertad. Eynan nan a mata nan cu tiro,” el a bisa.
Entre e personanan condena ta Saul Ernesto Molina Gonzalez, ken a ricibi un condena 120 aña di prison pa homicidio agravado y 42 aña pa trafico ilegal di personanan.
Tambe ta Denis Vladimir Aguilar Yañez, Oscar Armando Portillo Martinez y Jose Sixto Gomez, ken a ricibi condenanan di entre 6 y 60 aña di prison pa homicidio, encubrimiento y trafico di persona.
Di acuerdo cu otro fuentenan, e traficantenan of “coyote” na El Salvador ta forma rednan cu otro paisnan di Centro America, como Honduras y Guatemala, y nan ta traha cu cartelnan di droga na teritorio Mexicano.
Segun autoridadnan di El Salvador y organismonan internacional, e motibonan principal y historico cu ta hiba e Salvadoreñonan pa sali di nan pais di manera iregular ta e reunificacion familiar, buskeda di miho condicion economico y violencia.
