Hospital ta sigui traha duro y enfoca pa expande conocemento di dunadonan di cuido di Hospital mes pero tambe di Aruba y region. Recientemente a tuma luga un curso super intenso di un duracion di dos y tres dia largo organisa pa HOH Academy conhuntamente cu e comision di Antibiotica Stewardship di HOH.

Pa e curso aki a desaroya dos diferente programa, esta uno completamente enfoca riba e ‘eerste lijn’, esta dokter di cas, dentista, fisioterapista etc. y e di dos programa enfoca riba ‘tweede lijn’ esta pa e specialistanan. E ‘kick-off’ di e curso aki a tuma luga den e sala VIP di Gloria movies unda a habri e mainta cu un sorpresa bunita di Sr. Jacco Vroegop, director di HOH pa dr. Jaclyn de Kort unda a gradici’e pa su perseverancia y inspiracion pa ta e motor cu a inicia y sigui pusha pa e lucha contra AntiMicrobial Resistance(AMR) na Aruba y HOH.

Un bon resultado

E meta di e curso tabata pa tanto e dunadonan di cuido topa y asina mira unda por traha hunto y fortalece otro pa e bon di e pashent. Tambe e curso tabatin como meta pa duna hopi informacion y alabes papia di casonan practico pa asina nan eherce durante nan funcion. Lenie Denteneer, Manager di HOH Academy ta sumamente contento cu e resultado di e prome curso riba e tereno di maneho di antibiotica y ta di pensamento cu e profesionalnan cu a asisti e curso ta un paso mas dilanti pa loke ta trata antibiotica.

Denteneer a expresa cu “nan tabata en busca di un curso cu lo por involucra e ‘eerste lijn’ como tambe e ‘tweede lijn’ y ey nan a cay riba e uzo y maneho di antibiotica. Esaki sigur ta algo hopi importante pa loke ta e uzo corecto pero tambe pa e parti di resistencia. HOH Academy a tuma contacto cu e Antibiotic Stewardship Commission di HOH y asina e bala cuminsa lora y a logra yega na e tremendo curso aki.”

Orador for di diferente pais

Anna Posner, Clinical Teacher i.o. di HOH Academy a comenta cu “varios profesional a bin for di Hulanda pa comparti nan conocemento na e curso aki, pero tambe a conta cu varios profesional local di e Antibiotic Stewardship Commission.” E tabata importante mira y tende for di varios dokter cu diferente specialisacion procedente for di diferente pais p’asina mira cua ta e antibiotica corecto pa e diferente infeccionnan y virus. Sin duda, e interaccion cu e dokternan tabata loke a resalta y haci e curso mas interesante pa tur esnan cu a atende. Posner a expresa cu tur hende tabata masha entusiasma y nan a sinti cu despues di e curso nan por a bay y hinca e conocemento adkiri den practica.

Conocemento ta importante
 A conta cu presencia di cursistanan for di Aruba, Hulanda, Boneiro, Surnam y Corsou. Posner a comenta cu e tabata interesante pa mira con e dokternan ta atende cu cierto problema di salud y e motibo dicon nan ta scoge pa un cierto antibiotica. E informacion aki ta importante pasobra por ripara cu den cierto comunidad nan ta ‘build up’ un resistencia y pa logra esey ta scoge pa un antibiotica en bes di e otro. Pues e escogencia di uzo di antibiotica corecto pe pashent ta hopi importante.

Sosten ta importante pa exito

Pa finalisa Denteneer di HOH Academy, a expresa cu pa logra exito bo mester di un team y e curso aki el a traha hopi bon y di cerca cu e Antibiotic Stewardship Commission cu a hinca gran parti di e programa den otro y alabes pa a garantisa pa e curso ta adapta pa e cuido aki na Aruba, pero tambe a traha bon cu e Departamento di Comunicacion pa e parti di mercadeo y danki na Hunta di Directiva di HOH cu for di comienso a sostene e idea di e curso y a yuda pa e tabata un exito rotundo. Por ultimo danki na cada participante cu a kere den e curso aki y e tema di maneho di antibiotica mirando cu ta prome biaha cu ta organisa esaki na Aruba.