Bon cu no gobierno so… Ta duna informacion…

Ta bon cu no tur informacion obhetivo mester bin di nos gobierno. Ta obvio cu nos mester aprecia cu informacion valioso ta bin di otro fuente tambe. Esaki ta e pensamento cu nos tabatin despues di compara e relatonan di e encuentro entre gobierno y delegacion di CAft, unda e promer menciona a luci pa su falta di informacion concreto y a duna solamente di conoce cu e reunion a bay den bon ambiente. Esey naturalmente ta lo minimo; nos mester por spera cu autoridadnan ta trata otro mutuamente cu respet y cu por lo tanto tur reunion, hasta ora mester toca tema menos agradable, tur persona na mesa ta mantene norma di cortesia y respet. Y ya cu gobierno no tabatin nada mas di conta, ta bon anto cu semper CAft ta duna un rueda di prensa despues di nan bishita na despacho di gobierno, unda ta duna un vista mas amplio riba e temanan al caso.

Asina nos por a tende cu a papia tocante e recuperacion economico excepcional cu Aruba ta experimentando, cu ta duna un bon base pa traha riba creacion di un economia y un maneho gubernamental structuralmente mas fuerte y resiliente. Pero, esey ta exigi mas cu simplemente tuma e placa extra cu gobierno ta haya y laga lo demas pa casualidad di bida despues. Asina nos lo keda mes vulnerable atrobe, si un siguiente crisis mester bati na nos porta. Bisa cu esey ta improbable ta simplemente idioma infantil cu no ta yuda pa nada. Como gobierno responsable esey ta e tarea anto, ‘construi dam, warda awa’. Y ta net esey CAft, segun a resulta di nan rueda di prensa, a trece dilanti pero di parti di gobierno a ricibi un bunita potret pero nada di contenido di e reunion… Por lo pronto esey por keda asina tambe, nos no a spera mihor tampoco. Sin embargo, cu esey no por keda sin trata e retonan cu CAft ta señala y cu ta di suma importancia den e situacion actual. Gobierno di Aruba ta den un situacion bastante mas faborable cu loke por a anticipa un aña pasa y cu esey, yega na suficiente entrada pa paga cuenta – sin baha gasto – ta bien posible. Esey no por ta motibo pa laga e programa di reforma, cu mester ta den ehecucion hunto cu Hulanda, no continua mas. Y esey no pasobra e ta un compromiso cu Hulanda. Segun nos ta kere cu nos a comprende bon cla, ta cu henter e plan ta conta cu apoyo y conviccion completo di e actual gobierno, pues ‘manos a la obra’…

E problema ta cu nos ta keda cu e preocupacion cu nos no ta mira, y no lo mira tampoco tanto progreso den e reforma di e aparato gubernamental. Den e dianan aki nos ta haya tende por ehemplo cu a haci bon progreso cu presentacion na tempo di presupuesto. Esey ta un hecho cu merece aprecio, pero…, no ta menciona acerca cu di otro banda gobierno a cuminza cana sumamente atrasa cu e reportahe financiero di cada tres luna. Nos ta actualmente casi drentando luna di november y normalmente reportahe di kwartaal 3 lo mester ta cla aki un par di siman. Esey ta un preocupacion, y pakico? Wel, pasobra reportahe di kwartaal 2, cu mester tabata entrega na mitar di augustus, ainda no a yega na despacho di CAft. Pa colmo, CAft a anuncia den nan rueda di prensa cu esaki ta nan ultimo bishita pa e aña aki, loke ta implica cu nan no ta bin ni pa reportahe di kwartaal 2, mucho menos pa kwartaal 3. E unico motibo pa nan no haci nan bishita di custumber ta pasobra nan lo no ta haya nada mas pa comenta di gobierno… “Drecha esun, daña e otro,” nos lo tende algun di nos grandinan bisa. Pero e pregunta cu ta keda: pakico e cosnan aki mester bay asina? E ta simplemente sabotahe di parti di gobierno pa mustra nan desacuerdo cu e supervision?

Nos por imagina cu ultimo tempo aki tabatin bastante momento menos agradable den e comunicacion cu Hulanda encuanto e tema di supervision. E splicacion sin embargo segun nos ta mas simple. Nos ta kere cu te awe ainda, despues di ocho aña di supervision financiero, keto bay gobierno no a percura pa suficiente capacidad profesional pa atende e tipo di asunto crucial aki. Bo lo a spera cu por lo menos pa por cumpli cu e compromisonan den cuadro di e supervision nan lo a mustra nan bon voluntad y percura pa tin e cos aki bon regla, pero nada… Nos sa cu nos lo tende e pretexto cu ‘no tin placa pa esey’, pero aki ta hustamente unda Hulanda sigur lo por a yuda, ademas cu si ta asina tiki creatividad tin den gobernacion pa logra aloca recurso pa esaki, anto nos por wel di cera tienda. Pa colmo, e tipo di retraso aki tin consecuencia na otro lugar den e ambito gubernamental. Por ehemplo, Banco Central su ultimo boletin mensual, den cual ta aparece normalmente cifra tambe di ingreso di gobierno, ta di luna di mei. Asina aki aña ta bay caba y apenas lo tin cifra di promer mitar di aña… Y asina nos mester bay dilanti? Si nos no por mira avance den asuntonan asina clave, kico lo ta di e otro tareanan gubernamental unda gobierno ta luci malisimo pa falta di dato? Gobierno, sigui saca potret di reunion cu ‘a bay den bon ambiente’, mientras nos ta depende di informacion di otro.