Campaña largo dilanti porta
Aña 2016 a habri cu bastante tiro, pero no den celebracion di aña nobo so. Ainda no por evalua ki efecto e paso cu ministro Oduber a tuma lo bay tin. En todo caso ta parce cu mayoria di hende ta convenci cu e no a haci esaki pa retira y djis bay su cas como ciudadano comun y coriente. Tampoco tin e speransa cu actitud y rivalidad di su coleganan lo cambia. Al contrario, ta parce cu nos a mira e inicio di un campaña largo, cu si gobierno actual keda sinta henter e periodo di gobernacion, lo culmina otro aña september. Y pakico un campaña asina largo? Pa varios motibo, cu tin nan logica.
Lanta, financia y opera un partido politico di cierto peso awendia na Aruba no ta algo facil. Ora ta trata di un malcontento generalisa, unda casi espontaneamente un partido por surgi par di luna prome cu eleccion mes y crea un grupo grandi di siguido sin organisacion ni financiamento solido, ta un caso singular. Si no, ta solamente posibel pa crea un partido nobo cu un base considerabel, si por conta cu tempo y medio financiero suficiente pa crea e base y structura di e partido prome cu campaña electoral cuminsa. Esey ta haci cu, si un persona tin pensa pa lanta un partido nobo, e momento pa cuminsa cu esaki ta clave. Den caso cu Otmar Oduber realmente ta retira como ministro pa 1 di maart 2016, e lo tin mas o menos un aña y mey su dilanti pa eleccion 2017, loke ta parce rasonabel.
Un pregunta grandi ta cuanto e base di votado ta cu e por conta cun’e. No ta cuestion di conta cu tanto persona cu a vota pa su persona, y kere cu nan lo vota atrobe mescos. Por ta cu parti di nan tin lealtad na e partido y no na e politico individual. Ta importante anto, con pa atrae un grupo grandi di e electorado cu no a defini ainda kico ta bay vota.
Den e sistema politico na Aruba hopi biaha ta pone enfasis riba e lealtad grandi na cierto partido, den famia completo, specialmente e partidonan grandi AVP y MEP. Sin embargo, e lealtad aki no ta defini tur cos. Den eleccion di 2001 y 2009 nos a mira con e partido den gobernacion a ser castiga y e contrincante a haya un mayoria absoluto nobo, cu apoyo substancial di votado cu anteriormente a vota pa e otro banda. Ta existi anto, tanto lealtad politico como tambe un grupo considerabel di ‘swing voter’ cu por cambia e paisahe politico di nochi pa mainta. Loke ta causa e cambio drastico aki ta malcontento generalisa contra esun den gobernacion.
Awor, pa un politico cu ta parti di e gobierno actual, ta dificil pa keda sinta te ultimo momento anto bula afo y declara cu e ta contra e maneho cu e mes a defende te na ultimo. Esey ta haci necesario un proceso unda di forma gradual e politico ey ta distancia su mes di e maneho di e gobierno di cual e no kier forma parti mas. Ta esey nos ta kere di a tende den e palabranan di ministro Oduber despues di su bishita na Gobernador, y cu segun nos opinion no ta laga espacio mas pa regresa den seno di partido AVP, y pretende cu ‘aquí no pasó nada’. E ta mustra mas bien un paso bon pensa, pa por tin e tempo pa structura un organisacion significativo pa campaña electoral.
Hopi lo bay depende sin embargo tambe di e pasonan cu e partido den gobierno ta bay tuma den e temanan grandi nos dilanti. Un di nan ta e asunto financiero, unda un confrontacion cu Hulanda ta na horizonte, aunke e Hulandesnan lo warda te despues di eleccion pa Conseho di Siguridad di Nacion Uni na juni proximo, pasobra te na e momento ey Premier Eman lo ta util pa nan den lobbymento internacional pa purba logra un asiento. Tambe por ta cumbini pa laga ministro Oduber bay su so, sin exigi un muestra di lealtad di e miembronan di partido, pa e ora haya sa ken ta cu ken. Logico cu, si ta pensa cu ta miho pa haya sa ‘de una vez por todas’ cu ken bo por conta ainda, anto nos lo presencia un confrontacion asina, por ehemplo den parlamento.
Pero no ta solamente e partido di gobierno mester fiha su posicion; oposicion tambe lo mester opera na un manera sensato, si nan ta desea di probecha di e ultimo desaroyonan aki. Loke ta un di e elementonan cu ta falta den e discurso di oposicion te awor, ta kico mester sucede na San Nicolas si acaso no tin un refineria mas. Te awor oposicion ta insisti exclusivamente riba reapertura, pero no ta duna cara kico mester haci si esey no ta opcion mas. Pa nan tambe ta conta cu habri refineria, of desaroya San Nicolas integralmente, ta dos cos diferente y lo ta recomendabel expresa nan mes riba e tema aki.
