(ElNacional) – “Te na e momentonan aki ainda nos ta finalisando e detayenan di e fondo monetario,” Eri Kaneko, vocero y hefe di e seccion di Relacion cu Media di e Oficina di Nacionnan Uni pa Coordinacion di Asuntonan Humanitario (OCHA) a contesta via e-mail, na un consulta realisa pa Maria-Alejandra Aristeguieta, colaborador di El Nacional na Ginebra.
E fondo monetario, di cual no tin mas informacion riba dje, presuntamente lo conta cu tres mil miyon di dollar di placa Venezolano cu ta gevries den e sistema bancario internacional, lo wordo gestiona pa ONU. Su creacion ta tuma luga despues di e acuerdonan alcansa den e negociacionnan entre e gobierno di Nicolas Maduro y e Plataforma Unitaria na Mexico na November di aña 2022.
“Nacionnan Uni ta establece un fondo monetario di diferente socionan pa apoya e implementacion di e acuerdo social na Venezuela. E actividadnan financia pa e fondo monetario di diferente socio y lo beneficia e personanan mas vulnerabel na Venezuela brindando nan atencion medico y otro necesidadnan basico,” ONU a indica den un comunicado publica na New York dia 19 di october.
Dia 18 di october ultimo, Farhan Hag, vocero adhunto di e Secretario General di Nacionnan Uni, a indica cu Antonio Guterres a ricibi cu aprobacion e noticia di e acuerdo parcial anuncia pa e gobierno di Nicolas Maduro y e Plataforma Unitaria, firma na Barbados.
El a bisa cu e ta aplaudi e esfuersonan di e socionan regional y internacional y cu e ta apoya e implementacion di buena fe di e acuerdonan pa e celebracion di eleccionnan inclusivo, transparente y creibel den 2024, como tambe pa aborda e preocupacionnan den e materia di derechonan humano.
