Adiella Adamus tin un trayectoria largo den e mundo di baile. Aworaki como adulto e ta forma parti di e grupo di baile House of Heartbeats y Killetos, dirigi pa Pierangely Wever. Den un entrevista cu Bon Dia Aruba Adamus ta conta tocante nan show di baile cu ta tumando luga e fin di siman aki pa recauda fondo.

Adamus a conta cu e meta di e show aki ta eigenlijk un fundraising pa haya fondo pa drecha e airconan di e scol di baile cu ta situa den Cas di Cultura. El a splica cu e sala di e scol di baile ta basta grandi y den e sala tin cuater airco, pero aworaki dos di e airconan aki no ta trahando. Locual ta algo bastante fastioso, specialmente ora di baila.

“Eigenlijk ora cubo drenta caba bo ta sinti un calor. Esey ta sin baila y una bes bo cuminsa baila, bo ta cansa y ta calor. No tin echt manera tampoco pa habri bentana eyden pa haya aire. E airconan ta prioridad aworaki,” el a remarca.

El a agrega cu naturalmente tin otro cosnan cu tambe mester wordo drecha. Por ehemplo el a indica cu e plafond di e camber na unda ta cambia paña y unda tin costumenan warda, door di daño di awa a kibra full y esey ta haci cu e costumenan di baile tambe ta daña. “Pero aworaki eigenlijk como bailado e airconan ta principal,” el a resalta.

El a sigui conta cu e idea pa haci e fundraising show a nace despues cu e les di baile a cuminsa normal ora cu aña escolar ta cuminsa.

“Den september a bin cu e idea pa haci e fundraising show. Nos a bisa ban haciele. Nos ta usa kico nos tin. Nos por baila, nos tin talento, ban usele y wak con nos por haya fondo asina. E idea a cuminsa na september y for di eynan tabata djis train train train,” Adamus a remarca.

E training ta tuma luga tur siman. Den e caso di e gupo grandi, grupo cu cual Adamus ta baila, e trainingnan ta dos pa tres biaha pa siman, pero cu cada grupo ta depende.

Tin diferente grupo den e scol di baile. Sneaks and Beats Kids, cu ta pa muchanan di shete aña te cu 11 aña di edad, Sneaks and Beats Fam ta pa mucha/hoben di 12 aña te cu adulto, tin e grupo Killetos cu ta e bailenan riba riba zapato di hilchi y tin House of Heartbeats, cual ta eigenlijk un grupo separa pa por ehemplo presenta show di baile na eventonan local, entre otro.

Durante fin di siman ta bay tin cuater show den total. Cuminsando awe diabierna pa 7:30 di anohci, diasabra tin dos show, 4or di atardi y 7:30 di anochi y diadomingo tin un show 5or di atardi. E shownan ta conta tambe cu presentacion di Scol di Baile Diana Antonette y invitado special, Kevin Gumbs.

Pa loke ta e meta di un suma cu lo desea di recauda, Adamus a splica cu e teatro unda cu e show lo ta tumando luga no por wanta hopi hende, e ta un teatro chikito y e meta ta eigenlijk pa yega alrederor di 100 hende pa show. “Entrada pa 25 florin pa persona dus nos ta spera cu esey ta suficiente pa nos por cumpra un of dos airco pa reemplasa esunnan cu no ta trahando,” el a bisa.

Por ultimo Adamus a extende su invitacion na pueblo di Aruba pa pasa disfruta di e show, no solamente pa aporta na e causa, pero principalmente pa demostra apoyo na e muchanan cu ta bay haci e presentacionnan.

“Hopi di e muchanan aki a caba di cuminsa baila na augustus y ta nan prome show, nan prome biaha bailando pa publico y e ta un bon motivacion pa nan wak cu hende a bin wak nan baila. Nos cu ta bailado sa con e ta pa sinti con hende ta wak bo, ta wak kico bo a train pe. Dus e ta un motivacion pa e muchanan ki,” el a finalisa.