(AP) – President Joe Biden a bisa cu el a cera un acuerdo cu su homologo di Egipto pa permiti un prome grupo di 20 truck cargando ayudo humanitario drenta Gaza, cual Israel a blokea desde e atake di Hamas.
Israel a bisa cu awo nan ta dispuesto na honra Biden su peticion pa laga ayudo humanitario limita drenta Gaza.
E sociedadnan Red Crescent di Egipto y Palestina ademas di Nacionnan Uni ta premira di yuda lidera e operacion, parcialmente pa sigura cu e suministro for di e cargamento, cu lo drenta via Rafah Crossing na frontera di Egipto cu Gaza, yega na e ciudadanonan civil y no miembronan di Hamas. Oficialnan na Agencia di Salud di ONU a bisa cu nan ta “orando” pa e prome grupo aki por drenta riba diabierna.
Nacionnan Uni y su varios agencianan manera Organisacion Mundial di Salud (WHO), Programa Mundial di Cuminda y UNICEF, conhuntamente cu partnernan manera Cruz Cora y Red Crescent ta custuma cu move e ayudo necesario na areanan cu ta den conflicto of problema. Hopi biaha nan ta move den loke ta yama un “inter-agency convoy,” nificando un mix di varios grupo di ayudo.
Na conferencia di prensa diahuebs, WHO su hefe di emergencia Dr. Michael Ryan a informa cu un lista largo di articulo medico lo drenta Gaza cu 5 truck cu tin cla caba. Vocero di Programa Mundial di Cuminda a informa cu mas o menos 1000 ton di cuminda ta na e frontera y na caminda pa e sitio, suficiente pa duna cuminda na mita miyon persona pa un siman. Jan Egeland, hefe di Conseho Noruego di Refugiadonan a bisa cu “Hamas no tin mester di cuminda di baby ni tampoco boter di awa, nos ta papiando di salba e bida di e muchanan, muhenan na estado y famianan.”
E acuerdo cu a cera entre Israel y Egipto ta involucra miembronan di Nacionnan Uni cu lo observa y inspecciona e trucknan aki prome cu nan drenta Gaza y subi banderanan di Nacionnan Uni na ambos banda di Rafah Crossing, pa asina ningun bom Israeli cay na e area, segun oficial di Egipto y un diplomatico Europeo a informa.
