(AP) – Microsoft a completa su compra di creador di videogames Activision Blizzard pa 69 biyon dollar riba diabierna, marcando un di e adkisicionnan tecnologico mas caro den historia cu por a tin consecuencia riba henter e industria.
E noticia cu e trato a keda completa a bini 7 ora despues cu Microsoft a ricibi aprobacion final for di Britain su vigilante di competencia, cual a retira su decision anterior di blokia e adkisicion, kitando e ultimo obstaculo den caminda di e transaccion.
Tuma e studio tras weganan sumamente popular manera Call of Duty, Diablo y Overwatch lo ta un mehoracion pa Microsoft su consola Xbox, cual ta den tercer luga tras di Sony su PlayStation y Nintendo. E gigante di programacion tambe tin ambicionnan mas grandi pa ingresa Activision su weganan den su servicio di subscripcion cu ta traha manera un tipo di Netflix pa videogames. E casi 22 luna cu a tuma pa cera e titulo ta bini for di preocupacion di rivalnan y reguladornan di gobierno cu Microsoft lo por usa su coleccion di weganan pa stroba competencia. E ta parti di un consolidacion di e industria amplio cu tambe tin algun desaroyadornan di weganan independiente cu ta preocupa cu nan lo ser hala un banda si e industria aloca su recursonan na e frankisianan cu un historia di exito.
Te ainda e trato ta enfrenta oposicion di U.S Federal Trade Commission, cual a argumenta cu Microsoft lo por usa e consolidacion aki pa crea un “hardin cu muraya” rond di su Xbox Game Pass y e negoshi di weganan bao subscripcion. Sinembargo despues di a perde un bataya den corte pa stop e adkisicion, FTC awo mester cuminsa un bataya dificil pa purba di baha e escala. “FTC ta sigui cu e opinion cu e trato aki ta un menasa pa competencia,” vocero di FTC Victoria Graham a comenta riba diabierna.
Microsoft tin hopi tempo ta defende e trato como uno bon pa e industria di gaming, bisando cu su meta ta di atrae mas persona na Activision su weganan y hiba esaki na mas plataforma na luga di purba kita e weganan for di e rivalnan. “Sea cu bo ta hunga riba Xbox, PlayStation, Nintendo, computer of smartphone, bo ta bon bini aki y semper lo ta bon bini, hasta si Xbox no ta unda bo ta hunga bo frankisia favorito,” un declaracion di Phil Spencer, CEO di Microsoft su division di Xbox a expresa.
