Manera Bon Dia Aruba a publica den su edicion di 12 di juli 2023, un fuente anonimo di Universidad di Aruba a informa tocante un situacion delicado cu ta involucra e Rector di e universidad, Viola Heutger, y posibel gañamento riba su CV.

Colegio di Supervision di Universidad di Aruba a keda encarga cu investigacion ariba e caso aki, sinembargo no a confirma ni tampoco a desmenti si e informacion en cuestion ta corecto.

Awe mainta, a traves di un comunicado di prensa, Colegio di Supervision di Universidad di Aruba a anuncia cu a base di acuerdo mutuo, Rector prof. dr. Viola Heutger ta tuma despedida entrante 1 di November venidero.

Den e comunicado ta menciona e impactonan positivo cu e Rector tabatin durante su tempo como Rector di e universidad y ta menciona cu Heutger ta bay continua su carera na Universidad di Salzburg.

“Durante su temporada como Rector, varios desaroyo positivo a tuma lugar na Universidad, entre otro introduccion di dos programa di nivel Master nobo den “Governance & Leadership” y “Sustainable Engineering”; acuerdo entre universidad na Hulanda, Corsou, Sint Maarten y Aruba pa intercambio di studiante; expansion di facilidad cu reorganisacion di Centro Educativo Cristian, pa logra integra un aula pa les, oficina administrativo, y cafetaria, y e inicio di renobacion di Maria Convent; Desaroyo di varios curso y presentacion relevante pa comunidad di Aruba na The Center of Lifelong Learning,” e comunicado a indica.

E ta agrega cu e esfuerso di prof. dr. Heutger a contribui na colaboracion internacional pa Universidad di Aruba cu ta beneficia e studiantenan y ta enrikece investigacion academico. Ariba nivel regional, e colaboracion a resulta den un MOU cu Universidad di Corsou, Universidad di St. Maarten, y Instituto Pedagogico Arubano.

E comunicado ta indica cu Heutger lo muda pa Europa unda e lo sigui su carera academico, incluyendo duna les na “Summer School on European Private Law” na Universidad di Salzburg y lo participa na conferencia internacional na Paris, Pisa, y Palermo.

“E Colegio di Supervision ta gradici Viola Heutger pa su contribucion na Universidad di Aruba den ultimo dos aña,” e comunicado a finalisa.

Mester remarca cu den e comunicado no ta menciona ningun informacion tocante e investigacion cu e Colegio di Supervision lo mester a realisa den e caso di posibel gañamento di e parti di e Rector den su CV.

Manera ya caba menciona, den Bon Dia Aruba su edicion di 12 di juli 2023, a publica un articulo den cual ta trece pa dilanti informacion cu un fuente anonimo cercano na Universidad di Aruba a comparti pa loke ta trata e situacion delicado aki.

Segun e fuente anonimo, na momento cu a nomina Heutger pa e funcion, su meta tabata pa usa Universidad di Aruba como un trampolin pa yega na un otro funcion. El a sigui indica cu Deloitte, cu tabata encarga cu e proceso di reclutamento y seleccion, no a haci un background check y e ora mester a laga e departamento di HR di Universidad di Aruba encarga di e tarea aki, pero esaki no a sucede.

E fuente anonimo a splica cu a pone Minister di Enseñansa tocante e situacion, pero minister ta duda si e situacion ta real y si en berdad Heutger a gaña riba su CV. El a indica tambe cu algun hende na Universidad di Aruba tin miedo pa e informacion sali den media pa e atencion no causa cu Heutger ta perde e trabao na Universidad di Salzburg y ademas hopi ta wordo intimida tambe.

“Hopi hende tin miedo. Nan ta wordo intimida cu no ta bay extende nan of cu Heutger ta bay traha contra den facultad manera e ta haci awo den FEF pasobra FEF ta bao di un decaan nobo cu ta durf di bay contra Viola,” e fuente anonimo a remarca.

Den e articulo tambe ta trece pa dilanti un reportahe di un medio local di Austria cu ta subraya informacion riba Heutger su CV cu no ta cuadra. E reportahe ta indica cu Huetger no tabata ni ta un investigador na e Academia di Derecho Priva Europeo desde juli di 2013 te cu presente.

Segun un experto ta indica no tabatin ningun investigacion realisa den e academia aki, por lo tanto no tabatin tampoco ningun investigador.

E ta resalta cu e descripcion di Heutger ta fraudulento pasobra e Academia di Derecho Priva Europeo tabata simplemente un structura di ayudo pa financia un curso di zomer den Derecho Priva Europeo. Ademas e website di e academia aki no tin actividad desde 2012.

Otro punto cu nan ta remarca ta cu Heutger no ta, pa mas di 23 aña, profesor di e scol di zomer di Universidad di Salzburg. E experto ta señala tambe cu e scol di zomer tabata y ta un scol di zomer di tres pa cuater siman organisa pa e Departamento di Derecho Priva cu no por otorga un asignatura.

E ta resumi cu na e scol aki un persona no por djis bira profesor, pero como maximo por siña como profesor na banda. Sinembargo Heutger su afirmacion cu e ta profesor di zomer desde aña 2000, locual e ta remarca, ta un afirmacion falso.

Den e mesun luna, durante un conferencia di prensa di Gobierno di Aruba riba dia 19 di juli 2023 di Minister di Enseñansa y Deporte, Endy Croes, redactor di Bon Dia Aruba a puntra e minister si e tabata na altura di e caso.

Minister a contesta cu e no tabata na altura di e acusacionnan contra Heutger, el a sigura cu el a lesa e articulo y mesora a comunica cu College van Curatoren den cual tin miembronan hopi respeta den comunidad, manera el a sigura, nan a keda di haci un trabou di investigacion.

“Esaki ta algo cu prensa a skirbi, nan lo haci un trabou y bin back cerca mi, pero no cu ma sinti, laga nos pone cautelosamente, un nerviosismo of algo den un direccion cu lo no ta, mi kier duna un tiki tempo na College van Curatoren cu nan lo atende y nan lo bin prome cu fin di juli back pa por clarifica esaki,” el a expresa.

Sinembargo, na fin di juli ningun informacion oficial a sali pa indica cu e investigacion a termina y si e informacion contra di e Rector ta corecto si of no.

 

Cu e anuncio di e retiro di e Rector ayera mainta ta keda e duda si en berdad e retiro di Heutger ta pa motibo cu el a acepta un trabao na Universidad di Salzburg of si tin di e haber cu e informacion delicado cu e fuente anonimo a trece cerca nos.