(AP)—Un barco di carga pa aeronave Mericano a yega na Zuid Korea ayera den un demostracion di forsa contra Noord Korea, como cu e lider supremo di Noord a reafirma su empuhe pa fortalece relacion cu Rusia.
E USS Ronald Raegan y su grupo di bataya a yega na e waf Zuid Koreano di Busan despues cu a participa den un ehercicio maritimo cu e pais y Hapon den awanan internacional na comienso di e siman aki. E barco di carga pa e aeronave lo keda na Busan te dialuna otro siman como parti di un acuerdo bilateral pa engrandece “visibilidad regular” di activonan strategico Mericano pa e Peninsula Koreano como respuesta riba e avance di e programa nuclear di Noord Korea, segun un declaracion di e Ministerio di Defensa.
Esaki ta e prome yegada di un barco di carga pa aeronave Mericano na Zuid Korea den seis luna desde cu e USS Nimitz a para na Busan na maart. E yegada mas recien di e barco a ser causa pa un preocupacion cu Noord Korea ta pushando pa haya armanan sofistica for di Rusia den un intercambio pa suministracion di municion pa Rusia.
Hopi experto a bisa cu Lider Supremo Kim Jong Un lo kier e ayudo di Rusia pa construi un sistema di arma mas confiabel contra Merca y Zuid Korea. Washington y Seoul a adverti cu Moscu y Pyongyang lo enfrenta e consecuencianan si nan avansa cu e acuerdo di transferencia di arma, cual ta viola e resolucionnan di e Conseho di Siguridad di Nacionan Uni cu ta prohibi cualkier comercio di arma cu Noord Korea.
Ayera, Kim y Putin a intercambia mensahenan marcando 75 aña di relacion diplomatico entre e dos pais. Den su mensahe pa Putin, Kim a bisa cu e tabata “hopi satisfecho” tocante “un intercambio di opinionnan comprensivo y honesto” cu Putin durante su biahe pa Rusia, mientras cu e ta expresa tambe un sentimento cu e relacion bilateral lo desaroya pa un nivel nobo. Kim tambe a spera cu e pueblo Ruso lo derota “e politica y movementonan hegemonica di e imperialistanan cu ta isola y stroba Rusia,” segun Korean Central News Agency.
Putin, di su parti, a conta Kim den su mensahenan cu e ta satisfecho cu e hecho cu relacionnan bilateral ta sigui desaroya positivamente den tur aspecto, segun KCNA.
