Gobierno di Aruba a firma na ultimo ora un acuerdo cu Hulanda, pa preveni un ‘default’ riba nos debe cu e pais aki, ya cu e debe a madura dia 10 di october. Sin embargo, e accion d ultimo ora aki ta causa cu nos ta bay paga un interes halto (6,9%) riba e debe aki, en todo caso te dia tin un ley di Reino encuanto supervision financiero vigente. Te cu e tempo ey, loke por dura facilmente dos aña, gobierno di Hulanda ta di opinion cu gobierno di Aruba mester pasa e cambionan acorda den e protocol di 2018, manera esaki a keda prolonga te na fin di 2023 y cu a maneha tambe pa presupuesto 2024. Gobierno di Hulanda a pidi pa un reaccion pa mas tarda dia 10 di e luna aki, tambe en vista di cu Eerste Kamer (Senado) lo a vota riba e presupuesto suplementario cu tabata encera tambe e sumanan di e prestamonan renoba pa e islanan riba e fecha ey.

Nos Promer Ministro den e declaracion cortico duna diamars pasa, hunto cu vice-premier Arends, pa anuncia firmamento di e acuerdo, a referi na e cambio di ley exigi di un forma negativo, bisando cu Hulanda ta desea e cambio pa un ley di Reino, pasobra Aruba lo por cambia e actual ley di Aruba unilateralmente, loke segun e mandatario no ta posible. Pa esaki e ta mustra riba e protocol di 2015 (articulo 11; red.), unda ta estableci cu unavez e ley di Aruba, manera el a keda acorda entre Hulanda y Aruba na firmamento di e protocol, lo a keda aproba pa parlamento, cu gobierno di Aruba no lo permiti otro cambio den e ley tanten esaki no ta palabra cu gobierno Hulandes y aproba pa consenso den Conseho di Ministro di Reino. Es decir, cu lo ta imposible anto pa Aruba cambia e ley unilateralmente. E discurso aki ta completamente mancaron, pasobra Hulanda ta mustra netamente riba e hecho cu fraccion parlamentario di e partido di e premier a purba cambia e ley aki na 2019, tratando di elimina e supervision di gobierno di Reino, mientras cu e protocol ta bisa cu gobierno di Aruba “lo no duna cooperacion na cambio den e landsverordening menciona sin consulta cu Hulanda”. Masha bunita cu e mandatario ta referi na e protocol awor, pero el a haci su trabao di para su coleganan di partido? No, el a hunga e wega di cu e no por bisa parlamento nada, cu nan ta independiente, e organo mas halto, etc. Y el a festeha hunto cu nan den sala di parlamento despues di e aprobacion, mientras cu lo tabata logico cu el a haci uso di e facultad duna den Constitucion pa revoca e propuesta cu a keda daña pa e cambionan no autoriza cu su coleganan di partido a hinca den e proyecto di ley. Ora cu na Hulanda nan a ripara cu ta asina e asunto a bay, nan a para henter e proceso, pasobra tabata mester di firma di Gobernador pa e ley bin na vigor y esey no a tuma lugar.

Awor, lo por surgi e pregunta o argumento cu a bin un protocol nobo na november 2018 cu lo por a haci e stipulacionnan di esun di 2015 no vigente mas. Riba esaki e contesta ta cu esey no ta e caso, ya cu e protocol nobo ta bisa explicitamente cu si e contenido di e protocol nobo ta desvia for di esun anterior, e stipulacionnan di esun nobo lo prevalece. E stipulacionnan cu no a mira cambio, a keda vigente anto y mester respeta nan.

No cu nos promer mandatario a bisa esey cu tanto palabra, pero sin duda algun e materia aki mester tabata topico di discusion cu gobierno Hulandes. Ta mas cu visto, for di e diferente declaracionnan di tanto e ministro responsable como su secretario di estado, cu nan no ta desea di mira repiticion di e payasada cu a tuma lugar na 2019. Promer Ministro tin e obligacion anto, cu si acaso su coleganan di partido tabatin algun triki nobo pensa ora e propuesta di ley yega parlamento, e mes ta esun cu mester actua pa defende y proteha loke el a palabra cu Hulanda. Pero, si a pesar di su insistencia su coleganan di partido no kier tende y ta haci uso di nan ‘soberania’ como parlamento, kico ta bay pasa anto?

Pa esey tambe tin algo bunita den e promer protocol. Articulo 10 di e protocol ey ta bisa cu si acaso no tin un ley di supervision vigente na tempo, o cu e ley ta contene cambio cu ta desvia riba punto esencial di e texto acorda, tambe den caso di cambio o revocacion di e ley, “staan de bij of krachtens het Statuut aan de Koninkrijksregering gegeven instrumenten ter beschikking.” Na Papiamento crioyo: Gobierno di Reino lo tin na su disposicion e instrumentonan duna segun Statuut… Y kico ta e ‘instrumentonan’ ey? Loke nos a trece dilanti na varios ocasion: si Aruba no ta cumpli, e supervision lo por yega via e ‘instrumento’ den Statuut: un ‘Algemene Maatregel Van Rijksbestuur’ a base di articulo 43 inciso 2 di Statuut.

Esey si nos no a tende di nos Promer Ministro, cu a referi na articulo 11 y no na articulo 10… Ban supone cu su declaracion publico tabata demasiado cortico pa bay den e detayenan aki… En todo caso, tur tactica di ‘delay, delay, delay’ estilo Trump a parce di termina awor.