Nacionnan Uni hunto cu Xavier University ta inaugura e prome clinica gratuito pa duna atencion medico na hende cu no tin acceso na salud, por ehemplo, migrantenan cu no tin nan status regularisa riba e isla.
Alena Samanez, ken ta fungi como coordinador di proyecto di International Organization for Migracion (IOM) na Aruba, a informa cu diamars ultimo nan a habri e prome clinica gratuito na Aruba specialmente dirigi na hende cu no tin acceso na salud. Por ehemplo, migrantenan cu no tin un status legalisa riba e isla, aunke e tambe ta habri pa cualkier persona cu por tin mester di atencion medico.
“Nos ta bay atende e casonan cu lo ta necesario, pero primordialmente loke nos kier ta pa atende esnan cu no por haya acceso na atencion medico na Aruba. Y a traves di e esfuerso grandi aki, nos lo por logra un di e metanan di SDG’s, cu ta aumenta e acceso di salud na tur hende sin importa nan status migratorio ni nan nacionalidad,” el a bisa.
Esnan cu tin mester di atencion medico, por yega na Xaxier University diamars y diahuebs entre 4or di atardi y 8or di anochi, dialuna, diaranson y diabierna ta atende un dokter via afspraak yamando na e hotline di IOM na Aruba, ACNUR, HIAS of Fundacion Venearuba Solidario.
E prome paso ta un test medico basico di sucu, presion y colesterol y dependiendo di e resultadonan, ta bay haya un afspraak cu un dokter. Den caso cu e persona tin mester di remedi y e persona no tin e capacidad financiero pa cumpra e remedinan, ta posibel pa nan por haya voucher tanto pa medicina como pa haci testnan na laboratorio.
“Ta un servicio basico den sentido cu nos ta duna un servicio pa detecta un problema, pero tambe nos ta duna e vouchernan di remedinan cu ta depende di e tempo cu tin mester di dje, por ta 3 luna of seis luna. Ta pa pashentnan cronico cu tampoco tin acceso na salud debi na nan status cu no ta regularisa na Aruba,” Samanez a informa.
Cu apenas dos siman cu nan a habri e servicio aki nan a atende caba mas cu 200 hende segun loke Samanez a sigura.
