October ta conoci mundialmente como e luna di conscientisacion di cancer di pecho. En conexion cu esaki, manera tur aña, Mary Joan Foundation a anuncia nan caminata anual Pink Walk cu e aña aki tin algun toke diferente.
Tur aña Mary Joan Foundation ta organisa su Pink Walk anula pa conmemora e luna di conscientisacion di cancer di pecho. E aña aki tin un cambio pa esaki y en bes di un Pink Walk, e fundacion a organisa un Pink Hike cu lo tuma luga dia 29 di october y lo ta saliendo for di Bushiribana pa 6:30 di mainta.
E aña aki e topico di e caminata ta “describi naturalesa y descubri bo mes” y asina e fundacion ta duna sosten tambe na e tema di salud mental cu ta creciendo na e isla.
Otro cambio cu tin pa e caminata e aña aki ta cu no ta bay tin t-shirt. E fundacion ta encurasha e participantenan pa decora nan propio t-shirt y e miho t-shirt miho decora tin posibilidad pa gana premio.
E meta cu e fundacion tin cu e caminata e aña aki ta pa recauda 60 mil florin pa yuda cu e gastonan di e fundacion cu ta halto.
Mary Joan ta un fundacion cu no solamente ta duna sosten na e cliente, pero tambe na e famia y un di e costonan halto cu e fundacion tin ta e apoyo psicologico cu nan ta ofrece na e famianan cu ta pasando den situacionnan di cancer.
Pa loke ta otro actividadnan, e fundacion ta planeando pa luna di november, of pa proximo aña, pa organisa un actividad mas grandi pa asina haya mas fondo pa e fundacion mirando cu e aña aki e situacion ta poco diferente pa e parti di colecta pa motibo di e calor pisa cu tin na Aruba aworaki.
Pa loke ta e cifranan di pashentnan di pecho, lamentablemente e fundacion si a wak no solamente un aumento den e cantidad di pashent di cancer di pecho, pero e edad tambe ta bahando pa personanan cu ta sufriendo di cancer di pecho. Poco poco e edad ta birando mas hoben y e cantidad di persona ta birando mas.
