Ayera mainta Water- en energiebedrijf Aruba N.V (WEB Aruba N.V.) su director Alfredo Koolman a tene un conferencia di prensa pa trece dilanti diferente informacion di e compania, entre otro, distribucion di coriente, produccion y distribucion di awa di bebe.

Koolman a señala cu e produccion di coriente te ayera tabata na 257 dia di produccion di coriente continuo na WEB Aruba N.V. El a gradici esaki na nan operadornan y tur esnan envolvi den trabao aki. Nan a stabilisa nan planta nobo di motornan Recip IV, na unda el a sigura cu “nos no ta unda nos mester ta ainda, pero nos ta riba e bon caminda.”

Igualmente, el a informa cu nan ta trahando cu dos taskforce, un di WEB y otro di suministrado di motornan Wärtsilä pa lunanan caba, na unda conhuntamente nan ta ehecuta e plan di stabilisa y consolida na un manera eficiente y efectivo.

E traspaso definitivo di e planta nobo Recip IV ta bay tuma luga posiblemente na november. Tin un demanda halto pa coriente door di actividadnan economico y construccion, pero tambe door di ola di calor.

WEB Aruba N.V. ya caba ta conoce recordnan di produccion di 160 megawatt, e peak di demanda ta sigui crece e aña aki, y nan ta anticipa awo un record nobo di 165 megawatt. E informacion aki ta regarda produccion di coriente y no ta regarda distribucion door di N.V. ELMAR.

Pa loke ta trata produccion di awa di bebe, Koolman a informa cu recientemente nan a haci un destaho publico pa un planta nobo, cu a resulta despues di evaluacion, di ta un escogencia di un compania cu ta bay entrega e plan aki na WEB N.V. E siman aki nan ta bay bishita plantanan di e companianan scogi pa colecta informacion di operacion y experiencia di usuarionan di diferente localidad, pa asina nan por confirma nan escogencia y sigui cu negociacionnan. Ta plania pa na final di november firma y unabes construccion inicia, ta dura 18 luna pa tin e planta nobo operacional, cu lo ta na tercer kwartaal di 2025.

Construccion di Tanki na Alto Vista

E capacidad di e planta nobo ta alrededor di 6.000 meter cubico pa dia. E expansion di e capacidad aki di awa di bebe ta suficiente pa e siguiente decada y alabes nan ta construyendo un tanki nobo na Alto Vista cu un capacidad di alrededor di 18.000 meter cubico pa reemplasa e tanki bieu di 12.000 meter cubico.

E construccion di e tanki aki ta bay dura te augustus di otro aña. Koolman a sigura cu esaki ta nifica un inversion cuantioso di miyones di florin, sin duna detaye di cuanto specificamente, y despues nan lo sigui renoba e otro tankinan di otro districto.

“Tin un plan strategico cu den transcurso di tempo e expansion di e capacidad di produccion di awa ta pa e siguiente decada. Nos ta anticipa crecemento riba nos isla y nos ta inverti den tempo corecto.”

E demanda den e districto cu mas poblacion na Aruba, cu ta Noord, ta sigui crece y esey ta e motibo pakico nan a dicidi di amplia e capacidad di e tanki aki.

“Esaki ta un instalacion pa awa di bebe cu bo tin cu wak bon pa motibo di seguridad y salubridad di pais. Ttin un pensamento si cu nos tin cu restringi loke ta trata e parti di hendenan cu ta subi den area di tanki di Alto Vista pa motibo di riesgo, pero esey ta un evaluacion cu nos tin cu haci pa e sitio ey.” Koolman señala.

“Loke nos ta cobrando awor ta necesario debi na inversionnan”

Referiendo na e situacion financiero di WEB. N.V., Koolman a sigura cu nan a recupera den 2023 ya cu den 2022 nan tabatin tardansa door di introduccion di tarifanan nobo cu mester a cubri e gastonan di 2022. “Loke nos ta cobrando awor ta necesario en bista di tur inversion cu WEB tin cu haci den e siguiente añanan.”

El a papia tocante e proyecto di Eagle LNG, unda cu nan como WEB Aruba N.V. ta haciendo preparacionnan pa por ricibi e compania aki. Nan mes tin nan proceso di permisonan necesario pa e construccion.

Di proyectonan di energia renovabel manera biento, solo y bateria, Koolman a bisa cu nan tin atencion na esakinan hunto cu nan stakeholders, pa asina pa aña 2030 e 50% di energia cu ta genera riba e isla ta renovabel.

“Esaki ta costa tempo. Tabatin desaroyonan prome cu mi tempo, cu tabatin plannan pa otro parkenan na otro sitio na Aruba cu no a bay door. Aworaki nos ta enfoca riba e localidad di Rincon.”

Parke solar na San Nicolas tin un ambiente extremo

Parke solar di San Nicolas a bin dilanti como topico unda tabatin retonan pa produccion di energia den e luga aki. “Nan ta bisa cu ta falta di mantencion, pero ta mas bien e ambiente na San Nicolas cu ta asina extremo. Cu e experiencia cu nos tin pa mantene esey y pa busca partners pa e retonan logistico, a pone cu e produccion na parke solar en berdad a cay, pero entre tanto nos a crea un taskforce pa atende cu e mantencion y bin cu proposicionnan pa den futuro si nos expande e parke solar mes, pa siña tambe di nos experiencia cu e situacion ambiental extremo eynan. Entre tanto, nos a redobla e produccion di e parke solar den ultimo tres luna aki.”

Di e situacion di hedging pa aña 2023 nan a hedge tur e volumen di azeta cu nan ta usa den nan planta, unda cu pa 2024 nan a hedge caba 50% di e volumen di azeta y nan ta buscando e oportunidad pa hedge e otro 50% restante pa 2024.

Koolman a splica cu e prome paso ta cu nan ta preparando pa ricibi LNG, cu ta un combustibel alternativo; pa loke ta hedge cu nan kier deshaci di dje na termino y nan ta haciendo preparacion na Balashi cu na momento cu Eagle LNG yega cu e gas, pa nan por us’e pa por produci coriente.