(TheRoyalGazette) – Un grupo di manifestante a subi caya ayera mainta pa protesta contra e aumento reciente den costo di coriente. Alrededor di 50 habitante a reuni dilanti oficina di e compania di coriente Belco riba Serpentine Road na Hamilton for di 7or di mainta.
Hopi di nan tabata carga borchi cu mensahe manera “Ta Basta” y “Laga nos tuma nos poder back.”
E protesta a wordo organisa despues cu compania di coriente Belco a anuncia un aumento den e componente di Impuesto di Ahuste di Combustibel di su tarifanan, locual lo haci e recibo mensual por aumenta cu 20%. E aumento a cuminsa dia 1 di october.
Sean Smith, kende a yuda organisa e demostracion a traves di rednan social, a bisa cu e tabata motiva pa tuma accion pa motibo di un adulto mayor cu tabata su bisiña.
“E tabata descontento cu e Impuesto di Ahuste di Combustibel y a bisa cu e tabata escandaloso y cu no por soporta esaki mas,” el a bisa. “El a puntra mi kico nos por haci y mi a bisa cu nos mester organisa un resistencia of un protesta.”
Sr. Smith a reconoce cu e cantidad di hende cu a bin tabata chikito, pero el a agrega: “Esaki ta solamente un paso inicial, esaki ta e comienso. Mi tin confiansa cu nos lo logra resultadonan a largo plaso pero aworaki nos ta desapunta cu e gobierno aki.”
“Nan ta un gobierno sin control cu a lubida completamente ken a vota pa nan. David Burt berdaderamente no a presenta. E no ta haci suficiente.”
Hopi di e manifestantenan a bisa cu nan tabata indigna no solamente pa e ultimo aumento di prijs di combustibel sino tambe pa problemanan mas amplio manera e costo di bida, salario abao y falta di propiedad pa huur.
Diabierna ultimo Walter Roban, Minister di Asuntunan Interno, a bisa cu el a inicia un investigacion ariba e ultimo aumento. El a bisa cu el a skirbi un carta pa Autoridad Regulador, pidiendo un splicacion di pakico nan a aproba e tarifa nobo.
Na un conferencia di prensa, el a sigui enfatisa ripitidamente cu gobierno no tin responsabilidad den fiha prijs di coriente. Pero partido opositor One Bermuda Alliance a cuestiona e declaracion aki.
Douglas De Couto, Minister di Finanzas Sombra, a remarca cu e gobierno a traha e legislacion pa regla e RA independiente y cu e presidente di e compania di coriente Belco, Wayne Caines, ta un miembro di parlamento den gobierno.
Dr. De Couto a bisa: “Aunke gobierno y Belco a menciona hopi motibo pa e aumento aki y por ta cu tecnicamente nan ta sigui e diferente politica y leynan, e resultado ta papia pa su mes. E prijsnan aki no ta sostenible pa hopi hende na Bermuda, cu ya caba ta lucha.”
