Dialuna mainta, Minister di Husticia y Asuntonan Social, Rocco Tjon tabata presente na e inicio di e curso den cuadro di e “Arubaans Wetboek van Strafvordering” (Codigo di Procedemento Penal di Aruba) nobo. Aruba ta bay bira e prome pais den Reino pa laga e ley aki drenta na vigor 1 di maart 2024, esaki despues cu Parlamento di Aruba a aproba e ordenansa nacional na 2020.
Tjon a remarca cu pa combati criminalidad ta importante pa crea condicionnan adecua pa asina e cadena hudicial por actua y responde segun e expectativanan cu e comunidad tin di nan. Pa e motibo ey tambe, el a indica, ta hopi importante pa inverti den e organisacionnan, percura pa tur personal tin e materialnan necesario pa eherce nan trabao.
Pero mes of mas importante, el a subraya, ta pa tin e base legal, e parti legislativo tambe regla. Mas ainda, teniendo na cuenta cu criminalidad no ta para, pero ta sigui desaroya. P’esey ta importante pa percura pa e base huridico ta adecua, pa asina e ekipo investigativo por eherce nan trabao optimalmente, cual hustamente e Codigo di Procedemento Penal nobo ta percura pa haci.
“Awe nos ta inicia e proceso aki pa na maart 2024, Aruba como e prome pais den Reino introduci e wetboek nobo aki,” el a indica.
E minister a splica cu for di 2013 e proceso pa e ley aki a cuminsa. E comision encarga cu revision di e Codigo di Procedemento Penal a entrega nan conseho na 2014 y e mesun aña por a entrega esaki na Raad van Advies, pero esey no a tuma luga te cu aña 2018 caminda ex-minister di husticia, Sr. Andin Bikker, a entrega esaki. Despues Raad van Advies a entrega nan conseho y conseho aki a wordo trata y na 2020 Parlamento di Aruba a aproba e ley aki.
Den consulta cu Departamento di Legislacion y Asunto Huridico (DWJZ), a yega na e acuerdo cu e Codigo di Procedemento Penal nobo aki ta drenta na vigor dia 1 di maart 2024.
Tjon a splica cu teniendo den consideracion cu e leynan di pais Aruba mester ta den concordancia cu e otro paisnan den Reino, a tuma e Codigo di Procedemento Penal di Hulanda como punto di salida pa modifica y adapta e ley di procedemento penal di Aruba, pero teniendo semper na cuenta, el a remarca, e diferencianan entre un comunidad manera di Aruba y esun di Hulanda. Ademas, el a agrega, un gran parti di e cambionan den e ley ta basa riba sentencianan di Corte Europeo pa Derechonan Humano, otro leynan y tratadonan internacional.
El a señala cu prome cu percura pa introduci e ley nobo, ta importante pa tin tur e condicionnan na luga y un parti hopi importante, mirando tur e cambionan cu ta tuma luga, ta pa percura cu tur esnan cu mester traha cu e ley aki ta bon educa y nan haya un splicacion amplio di e materia.
E Codigo di Procedemento Penal nobo ta haci cu e ley ta bira mucho mas comprendibel pa e profesionalnan den e cadena hudicial, pero tambe pa e ciudadanonan. E ley ta percura tambe pa e cadena hudicial por funciona optimalmente, y combati otro tiponan di criminalidad cu ta desaroyando. “Pues, e ley di procedemento penal di pais Aruba, lo bay ta mucho mas miho organisa pa atende cu e situacion actual y di futuro,” Minister di Husticia, Rocco Tjon a resalta.
“E codigo aki ta haci nos como pais resiliente pa e situacion actual, pero tambe e ta tene cuenta cu fenomenonan pa futuro. Por ehemplo e parti cibernetico aworaki, esnan cu ta bay investiga e casonan aki ta bay tin mas herment pa percura cu e investigacionnan aki ta mas solido,” el a agrega.
Pa e motibo aki, el a indica, durante e Justitieel Vierlanden Overleg entre e paisnan den Reino a tuma e decision pa inicia e proceso y laga e ley aki drenta na vigor na Aruba, como e prome pais den Reino. E ley aki ta brinda e instancianan hudicial mas herment pa atende cu criminalidad, na mes momento ta tene cuenta tambe cu derechonan di victimanan y detenidonan.
Minister Tjon a enfatisa cu esaki ta importante pasobra e derechonan pa loke ta trata e victimanan ta wordo hancra miho den e ley y e ta bira mas facil pa durante casonan nan tin e derecho pa comparti nan storia y nan por haya recompensacion.
Banda di esey tambe, el a agrega, ta introduci metodo nobo, herment, pa polis y Ministerio Publico por haci miho investigacion.
“Cambionan sumamente importante pa di e forma ey nos por percura pa combati criminalidad miho y sigui e reduccion den criminalidad,” el a subraya.
Durante dos siman docentenan di Universidad di Aruba hunto cu un fiscal di Ministerio Publico lo percura pa mas di 200 persona cu ta traha den henter e cadena ricibi e curso den e materia aki, pa nan tin un bista di con e Ley di Procedemento Penal lo bay mustra na aña 2024 y di e forma ey ta prepara pa por inicia e proceso.
E participantenan ta consisti di miembronan di Cuerpo Policial, Ministerio Publico, Corte Comun di Husticia, Landsrecherche, Veiligheidsdienst, Reclassering, Departamento di Asuntonan Social, Koninklijke Marechaussee, Abogadonan, y demas stakeholder den e cadena hudicial. Esaki ta brinda un oportunidad pa por tin intercambio di idea, dialogonan proactivo pa asina mehorando tambe e cooperacion entre e diferente organisacionnan den e cadena hudicial.
