Ta spera cu Senado Hulandes ta bay aproba e amienda di presupuesto, habriendo caminda pa refinanciamento di e debenan cu Hulanda a duna Aruba, Corsou y Sint Maarten durante pandemia di Covid-19.
Segun un articulo di noticiero di Corsou, CuraçaoChronicle, por conclui esaki for di e debate di ayera mainta, den cual solamente vocero di PVV, Alexander van Hattem a anuncia cu su partido ta bay vota contra. E no tin confiansa cu lo paga back e prestamonan nunca, y ta kere cu e paisnan cu ta eherce su status autonomo no mester busca dependencia financiero riba Hulanda.
PVV a entrega un mocion (futil) pa usa e refinanciamento di 1.1 biyon euro den refinanciamento pa negoshinan na Hulanda cu ta den riesgo di bancarota pa motibo cu nan no por paga nan propio prestamonan di Covid-19.
Senador Peter Nicolai di PvdD tabatin un perspectiva diferente. E no tabatin palabra amable pa e exigencia haci pa Aruba bay di acuerdo cu un ley di Reino pa supervision financiero, cual e ta kere ta frustra e derecho presupuestario di e estadonan eligi democraticamente. “Con e Gabinete ta tribi? Cua ambtenaar ta bin cu un cos asina? Con humiliante e ta pa ser trata asina den un pais autonomo?”
Nicolai, kende a usa e palabra “blackmail,” ta haya cu ta “indecente” cu ta castiga Aruba cu un tasa di interes halto di 5.9%. “Nos ta un famia; ta logico cu e ruman grandi ta yuda y no ta castiga.” El a argumenta cu supervision financiero ta bon regula basa riba e ordenansa nacional actual.
Secretario di Estado pa Relacionnan di Reino, Alexandra van Huffelen a enfatisa cu Aruba por unilateralmente haci cambio na un ordenansa nacional, por ehemplo, door di caba cu e rol di Colegio di Supervision Financiero. El a bisa cu e ta hay’e “hopi desagradable” y “realmente decepcionante” cu no por a yega na un acuerdo cu Gabinete Wever-Croes riba un ley di reino cu ta riba mesa pa casi tres aña. Awo cu e tasa di interes ta conoci, ta cla cu Aruba ta bay paga 32 miyon euro mas den interes cada aña cu si lo a bay di acuerdo cu e ley di reino.
