(AP) — Minister di Defensa Sur Koreano a bisa ayera cu e lo pusha pa suspende un acuerdo militar inter-Koreano di 2018 pa asina reanuda vigilancia na frontera riba su rival Nort Korea, ya cu e atake sorpresa di Hamas contra Israel a genera preocupacion na Sur Korea pa atakenan similar di e Nort.
E acuerdo, alcansa durante un periodo breve di diplomacia entre e ex-presidente liberal di Sur Korea, Moon Jae-in y lider Nort Koreano, Kim Jong Un, a crea ‘buffer zones’ riba e fronteranan maritimo y terestre y ‘no-fly zones’ riba e frontera pa preveni enfrentamento.
Papiando cu reporteronan na Seoul, minister di Defensa Sur Koreano, Sin Wok-shik a cita e violencia na Israel y Gaza pa insisti riba e necesidad pa reforsa monitoreo na e Nort. Shin a keda nombra pa presidente Yoon Suk Yeol diasabra.
Shin tabata particularmente critico di e ‘no-fly zones’ di e acuerdo inter-Koreano, cual e ta bisa ta preveni Sur Korea di utilisa completamente su activonan di vigilancia aereo na un momento unda menasa nuclear di Nort Korea ta aumentando.
Relacion entre e Koreanan a deteriora despues di e collapse di negociacionnan mas amplio entre Washington y Pyongyang na 2019 tocante e programa di arma nuclear di e Nort. Nort Korea a menasa di bandona e acuerdo di 2018 mientras ta aumenta test di misil na un velocidad record, pa loke e conservador Yoon a tuma un postura mas fuerte riba Pyongyang cu su predecesor.
Mientras cu lo tuma un proceso legal complica pa Sur Korea bandona e acuerdo completamente, pone un pausa riba e acuerdo lo rekeri apenas un decision di un reunin di gabinete, Shin a bisa.
