Aruba incapaz pa… Crea innovacion…?

Aruba su economia ta bayendo bon; esey nos por destila for di e cifranan di operacion di gobierno di Aruba. Tur cifra cu ta indica progreso economico ta mustra adelanto, manera por lesa den un articulo cu ta aparece den e edicion aki. Tambe nos por a ripara cu SVb a registra pa 1 di october ultimo un cifra di cantidad di cupo di trabao, full-time o part-time, di algo mas di 44.000. Esaki ta un cifra mas halto cu na cualkier momento den e periodo pre-Covid.

Cu e noticia positivo aki nos por canta gloria y bay drumi tranquil? No, nos por ta contento cu e recuparacion economico a bay bon, pero na tur momento nos mester keda mantene nos vista riba futuro y mira kico esey por trece pa nos. A pesar di e miedo cu nos ta cay den repiticion aki, ta necesario pa enfatiza cu avance economico no ta cuestion di simplemente calcula un par di porciento acerca tur aña y nos ta cla. Lo mester mira e aumento di produccion (y productividad) tuma lugar tambe. Y aki ta indispensable pa tuma na cuenta e advertencianan cu a surgi ultimamente, specificamente for di e sector primordial, turismo. Manera e cifranan publica pa e organismo empresarial cu ta representa e sector ta mustra, ultimamente tabatin algun luna caba cu e grado di ocupacion na e hotelnan (afilia) tabata menos cu na e mesun periodo na 2019. Ademas ta mira menos ocupacion tambe bayendo fin di aña aki, cu por yega na 9% menos pa henter 2023, cu na 2019. Motibo pa panico? Ainda no. Por mira cu ocupacion por ta menos pero nivel di prijs pa camber cu por capta por compensa esaki. No necesariamente e beneficionan di e sector lo ta menos, cu consecuencia cu e efecto riba resto di economia, den forma di contribucion na poder di compra local no mester ta negativo.

Sin embargo, si nos por mira cu maximamente sector turistico ta capaz di mantene su mes na e nivel actual, en todo caso lo no tin mas crecemento economico, pasobra practicamente henter e resto di economia ta depende di e poder di compra total cu pa gran parti ta relaciona directamente cu sector turistico. Di unda e proyeccionnan di aumento aña tras aña ta bin anto? Banda di exportacion di servicio turistico nos tin casi nada pa exporta y trece aden divisa cu nos mester pa amplia e base di importacion. Lo core mustra riba tur e acomodacion turistico cu ta bay habri ainda, pero ken ta bisa cu esey ta amplia e base, o ta cuminza e proceso di ‘canibaliza’ otro? Nos lo por haya e comentario tambe cu ‘ta pesey nos ta trahando riba e sectornan ‘innovativo y prometedor’… “Corecto,” nos lo bisa, “y unda nos ta cu esey?” Nos no ta puntra esaki pa ta negativo, mucho menos cinico, pero e presentacion di ‘alternativa interesante’ a bira un disco raya caba den ultimo decadanan. Y pa colmo, ora nos haya oportunidad pa realmente haci algo, ta cay un silencio profundo… Hopi aña pasa caba nos a haya e recomendacion pa haci algo concreto cu ‘turismo medico’. Nada a sucede, y pakico no? Laga nos duna un ehemplo. Varios biaha den ultimo decada nos a haya bishita di un grupo di clinica medico di categoria di Colombia, cu tabata desea di establece nan mes aki, pa duna servicio specializa, no dirigi na e ciudadano local na promer lugar, pero pa trece un parti di nan clientela cu ta bin di exterior, por ehemplo Merca y Canada, aki en vez di laga nan bin Colombia. Nan tabata pensa cu e atraccion di Aruba como centro turistico lo atrae pacient cu ta bin cu famia, pasobra ‘Aruba ta Aruba’. De paso nan por duna servicio na hende local cu ta bay Colombia o otro pais pa un ‘second opinion’. Esaki fuera di e structura di AZV, pues nan no ta afecta nada di viabilidad di nos seguro medico, pero esun cu ta biaha riba su mes gasto pa e segundo opinion ey, lo por hacie na Aruba mes. Awor, pakico nan no por a logra nada? Pasobra nos gobernantenan, y nan asesornan, tin miedo di kima nan curpa cu awa friu, na modo di papia. O nan ta kere cu nos mes ta crea e infrastructura ey? Mas leu cu un reparticion di tarea riba tereno medico cu e otro islanan, pa cual Hulanda ta pone presion, nos lo no yega, y pakico no? Pasobra nos institutonan ta demasiado burocratiza pa por yega na nivel profesional halto y innovador pa por atrae cliente cu ta bin cerca nos pa nos reputacion… Nos no tin ni un base pa traha na un manera drechi cu nos profesionalnan, mucho menos pa crea un ambiente adecua pa amplia berdaderamente un base structural cu profesional di nivel, local y stranhero, pa por crea un sector considerable cu ta trece un fluho sustancial di divisa aden. Y di e manera aki nos ta laga oportunidad pasa bay na otro destino, unda si ta comprende cu bo mester por tin un vision y mente mas amplio pa por crea e tipo di negoshi aki, pasobra esey e ta: un negoshi. E ta posible ora cu gobierno ta limita su mes na haci su trabao di crea e infrastructura legal y di supervision, pero no ta mete den loke ta e organizacion di un sector asina. Lamentablemente, nos mester supone cu pensa y actua na e nivel aki no ta pa nos gobernantenan…