Ayera tardi durante un conferencia di prensa di Gobierno di Aruba, Minister di Asunto Economico, Comunicacion y Desaroyo Sostenibel, Geoffrey Wever, hunto cu Minister di Enseñansa y Deporte, Endy Croes, a anuncia e proyecto Sport Entrepreneurship.
Minister Wever a splica cu e proyecto aki ta un proyecto cu a wordo desaroya pa Ministerio di Asuntonan Economico hunto cu Ministerio di Deporte na unda ta probecha e oportunidadnan economico cu tin den deporte.
“Parti di e maneho di Ministerio di Asuntonan Economico ta pa stimula entrepreneurship. Nos ta kere tin oportunidadnan tambe den deporte y pa e motibo ey nos ta lansa e proyecto aki,” Wever a remarca.
El a sigui splica cu Sport Entrepreneurship ta un proyecto cu ta consisti di 19 topico, 18 tayer y 24 sesion cu ta bay ofrece cuminsando for di dia 30 di october te cu otro aña den luna di februari. Cu e proyectonan aki e participante, persona cu ta activo den e mundo di deporte y cu tin pasion pa deporte, lo siña busca oportunidadnan economico.
Minister Wever a indica cu durante e proyecto ta bay trece diferente topico na atencion di e participantenan. Entre otro, introduccion na sport entrepreneurship, identificacion di oportunidad, marketing y benta den sport entrepreneurship, planificacion financiero y management pa entrepreneur di deporte, problemanan legal y etico den sport entrepreneurship, innovacion y tecnologia den deporte, liderazgo y trabao den ekipo, practicanan sostenible den sport entrepreneurship y con pa gana den turismo den deporte.
El a enfatisa cu e meta di e proyecto aki ta pa stimula esnan activo den deporte pa busca e oportunidadnan economico, desaroya nan mes y wak con nan por lanta un negoshi den e area di deporte.
“Nos ta kere tin hopi espacio y pa e motibo ey nos ta ofrece e programa di training aki na unda nos ta bay siña e personanan con pa traha un plan di mercadeo, con pa traha un plan di negoshi, con pa prepara e maneho financiero di e negoshi, incluyendo presupuesto, pronostico, recordnan financiero, siña e uso di cierto tecnologia y innovacion y pone enfasis riba e habilidadnan di liderazgo di trabao den ekipo,” Minister Wever a resalta.
Unidad di Idea di Departamento di Asuntonan Economico a scoge lidernan riba cada topico pa facilita e tayernan aki na e participantenan. E mandatario a ratifica cu e proyecto aki ta un oportunidad unico pa esnan activo den e mundo di deporte pa adkiri mas conocemento y hermentnan, y converti nan pasion y nan hobby den un negoshi.
Minister Wever a resalta cu entrepreneurship ta algo hopi amplio, tin diferente topico y industrianan caminda specialisa. El a menciona como ehemplo e proyecto cu Gobierno di Aruba ta bezig cune tambe, cual ta e agri-entrepreneurship, un proyecto pa bira empresario den agricultura. “Nos kier demostra cu nos tin atencion pa tur e gruponan, tur e industrianan.”
Minister di Enseñansa y Deporte, Endy Croes, tambe a enfatisa cu e proyecto Sport Entrepreneurship ta un idea nobo pa motiva y stimula tur esnan cu tin conexion cu deporte, cu tin un of otro idea pero nunca tabata sa con pa cristalisa esaki.
“Esaki ta un bon oportunidad pa ex atletanan, atletanan mes, gruponan den comunidad cu tin interes pa logra algo a traves di un negoshi den deporte. E ta duna oportunidad na tur esnan cu tin di haber cu deporte pa por bira un entrepreneur y haci comercio cu deporte na un forma cu nan ta wordo educa pa haci esaki pa asina oficialmente tin un negoshi den futuro pa gana placa y participa den economia total di Aruba,” el a remarca.
