Siman pasa, Minister di Asunto Economico, Comunicacion y Desaroyo Sostenibel, Geoffrey Wever, a reuni cu gobernador estado Falcon, Venezuela. Durante conferencia di prensa ayera mainta, Minister Wever a splica kico e punto di atencion di e reunion tabata.
Durante e ronda di pregunta di parti di miembronan di prensa, Minister Wever a indica cu durante e reunion cu e gobernador di estado Falcon no a discuti ariba e tema di apertura di frontera aereo, pero a si a toca e tema di e ‘Virtual Busienss Matchmaking’.
El a splica cu e ‘Virtual Business Matchmaking’ ta un evento specialmente entre comerciantenan di Aruba y comerciantenan di Venezuela cu gobierno ta trahando riba dje.
El a sigui splica cu tabatin combersacion tocante e contenido di e agenda y con ta bay hiba e virtual business matchmaking aki, ken ta bay participa y con e organisacion ta bay ta.
E mandatario a indica tambe cu a cuminsa papia ariba e mision comercial cu gobierno kier haci pa Venezuela cu tin como meta pa hiba e empresarionan di Aruba pa nan topa cu e empresarionan di Venezuela, pa stimula y motiva e empresarionan di Aruba pa importa y pa haci negoshi cu Venezuela den beneficio di e consumidor Arubano, buscando manera pa baha prijs, trece producto nobo y oportunidadnan economico nobo.
A puntra e minister si pa stimula e comercio di e forma aki, apertura di frontera no lo ta necesario. El a remarca cu e frontera maritimo ta habri y esey na e momento aki ta duna oportunidad pa sigui explora oportunidadnan riba e tereno aki.
El a agrega cu aworaki mester busca manera pa inventarisa kico ta otro obstaculonan cu por tin pa asina purba di reduci esaki y di e forma ey stimula cu e empresarionan pa haci negoshi, importa mas producto di Venezuela y trece miho prijs pa e consumidornan.
