(AP) – Rapper 21 Savage awo por legalmente biaha fuera di Merca y tin plan caba di haci un presentacion internacional na su pais natal London. Savage su abogado, Charles Kuck, a conta The Associated Press den un declaracion diabierna cu su cliente oficialmente a bira un residente oficial y permanente di Merca y awo por haci biahenan internacional.
El a logra victoria contra e desafio grandi aki despues di ser tuma den custodia pa agentenan di U.S Immigration and Customs Enforcement na Georgia den aña 2019. Kuck a bisa cu e ganador di Grammy a sigui “tur ley di inmigracion aplicabel desde su detencion inicial di parti di ICE. Su proceso den corte awo a ser termina y e ta un residente permanente legal di Merca cu e libertad di biaha internacionalmente,” Kuck a declara.
Savage, ken actualmente tin 30 aña y su nomber real ta She’yaa Bin Abraham’Joseph, a pasa 10 dia den un centro di detencion di Georgia prome cu su libertad. El a keda aresta den un operacion dirigi na su persona a causa di su visa, cual a caduca den aña 2006.
E rapper basa na Atlanta a bisa cu e no tabatin idea di kico un visa ta ora cu su mama a trece su persona Merca cu 7 aña di edad. El a conta den un entrevista di aña 2019 cu AP cu inmigrantenan manera su persona cu a biba na Merca ilegalmente como muchanan automaticamente mester bira ciudadanonan Mericano.
Savage a bisa cu e proceso di aplicacion pa visa ta kita motivacion di varios inmigrantenan cu no tin documento pa motibo cu “e ta colga riba bo cabes pa semper.” El a anuncia su regreso pa London via rednan social pero no a duna mas detaye.
