Un ministro tin obligacion di contesta pregunta cu parlamentario, di cualkier partido, ta dirigi na su persona? Esaki ta e pregunta cu a surgi a base di keho reciente di un parlamentario. Esey en principio ta asina pero den practica no ta bay asina. Mas tanto e ministronan ta contesta rapidamente si ta trata pregunta haci pa nan propio miembronan di parlamento, o di e coalicion si esey tin. Pregunta di banda opositor mas tanto ta haya contesta ‘cuando se le de la santa gana’ manera nan sa bisa na Spaño. Y den hopi caso e ‘gana’ ey no ta yega nunca… Esey no den tur caso ta asina. Tabatin ministro cu a haci un esfuerzo pa contesta pregunta parlamentario dentro di un tempo razonable. Pero a crea den menos di cuarenta aña varios ‘tradicion’ den nos sistema parlamentario, cu mas bien nos por yama ‘mal custumber’. Entre nan nos tin tambe e maña di e presidentenan di parlamento pa tarda cu honra peticion pa reunion di oposicion y hasta sa sucede cu tin reunion cu nunca ta tuma lugar. Aki tambe tin algun excepcion cu lamentablemente ta ilustra e mayoria negativo.

Sin embargo, ta trata di un obligacion cu e ministro tin cu ta estableci den nos Constitucion. Articulo III.17 ta bisa: “Cada miembro di Staten tin derecho di haci pregunta nan e ministronan y e secretario di estado. E ministronan y e secretario di estado ta contesta e preguntanan aki dentro di un termino razonable, asina leu cu e contestacion di nan no por ser considera conflictivo cu interes di e Pais o di Reino.”

Nos mandatarionan tin anto un obligacion pa contesta, pero kico ta pasa si nan no kier contesta? Na promer lugar ta imperativo pa laga e parlamentario sa, mediante notificacion por escrito, si tin motibo di interes di e Pais o di Reino pa no duna contesta, loke mas tanto lo tin di haci cu aspecto di seguridad di estado. Pa motibo di e mesun seguridad ey no ta posible y tampoco necesario pa bay mas den detaye. Pero, por usa e argumento ey den un caso unda e no ta hustifica? Sigur cu si, pero no tin un manera pa apela esey, pasobra no tin un motivacion cu ta apelable. Awor e caso unda asunto di seguridad nacional o di Reino no ta al caso, kico ta pasa si e mandatario no ta contesta? Nada, simplemente nada, pasobra no ta existi sancion pa e incumplimento, salvo e caso cu parlamento acepta un mocion di desconfianza contra e ministro pa no cumpli cu Constitucion, pero esaki no a sucede nunca y esnan di nos na bida actualmente muy probablemente lo no presencia esey mas tampoco.

Un di e otro instrumentonan cu Staten tin pa yega na informacion ta e derecho di entama un investigacion, loke ta estableci den articulo III.19 di Constitucion, cu e observacion cu e derecho aki mester ta regla den un ley (landsverordening). Un ley asina ta existi (Enquêteverordening; AB 1989 no. GT 45), cu ta regla un comision forma pa miembro di parlamento, cu ta haya un encargo pa investiga di un asunto debidamente defini. Den nos historia parlamentario tabatin varios momento pa haci uso di e instrumento aki, pero esey no a sucede. Den cierto caso di sospecha di delincuencia grave tabatin caso unda investigacion a tuma lugar via organismo Hulandes, manera e caso di atentado contra integridad di archivo di Servicio di Inteligencia na 1994, cu a resulta den un rapport di Veiligheidsdienst di Hulanda, cu a resulta den un ministro cu inicialmente a perde su puesto pero despues por a keda toch, mientras cu dos comisario di polis a bira e ‘scapegoat’ y a perde nan trabao.

Y ya cu nos ta trece diferente articulo di nos Constitucion dilanti, nos ta para keto un rato na algo cu por bira di interes den e proximo lunanan. Ta trata di articulo V.6-1 cu ta bisa: “Tanten un proyecto di ley (ontwerp-landsverordening) entrega pa gobierno, no ta aproba pa Staten, esaki por ser revoca pa gobierno.” Inciso 2 di e articulo ta referi na e mesun caso ora ta trata di un proyecto di ley entrega pa un o mas miembro di parlamento. Pakico anto esaki por bira interesante? Nos tin proximamente e caso di e cambio di ley di supervision financiero di Aruba (Laft) unda gobierno Hulandes a laga gobierno di Aruba sa cu nan ta desea cu e cambionan cu nunca a inclui den e ley aki y cu ta bin di e Protocol di 2018, mester bay den e ley y ta na vigor promer cu 1 di januari 2024. Bon Dia Aruba a haya contesta di nos Promer Ministro cu a confirma cu ta trahando riba esaki, pero cu nan ta pendiente di Hulanda pa aproba e texto. E punto pa nos ta cu no mester pasa loke a pasa na 2019 cu fraccion di e partido grandi di e coalicion a sabotea e cambio ey, cu aparente aprobacion di e promer mandatario, pasobra e no a haci uso di su oportunidad pa retira su propuesta. E manera cu e asunto a bay a haci cu e no por a cumpli cu su compromiso cu Hulanda, pero e no a actua, al contrario… E pregunta ta awor si nos ta haya un repiticion di e comedia ey, pa e biaha aki e no laba man pero actua segun Constitucion…

E diferencia ta naturalmente cu deseo di gobierno Hulandes na e momento clave aki ta mas dificil pa pusha un banda, compara cu un simple parlamentario opositor…

LJMADURO – 06-OCT-2023