(NLTimes)—Un persona a keda herida den un explosion na un cas na Wateringen ayera nochi. E servicionan di emergencia a hiba e victima hospital pa tratamento. Tambe tabatin un otro explosion na un practica di abogado na Den Haag, como tambe dos tirateo na Rotterdam, di cual un a tuma luga den trein.
E explosion na Wateringen a sosode na un cas riba Prins Clausstraat rond 2:45 di marduga. E explosion a causa un candela chikito, cual a haci daño na e parti dilanti di e cas. Un persona a bay hospital pa por haya tratamento, segun e polis a bisa. Nan no a bisa si e victima tabata un residente di e cas ni con herida el a keda.
Rond 3:30 e mesun anochi, un otro explosion a rementa na un practica di abogado riba Buitenom na Den Haag. Ningun hende a sali herida, aunke e parti dilanti di e edificio a ricibi daño. Polis ta investigando tur dos incidente. Te awo no ta claro si esakinan ta conecta cu otro.
Tirateo na Rotterdam
Rond 10:55 di anochi diahuebs, tiro a zona den trein riba plataforma 6 na Rotterdam Centraal Station. Un discusion tenso a resulta den un pelea, y un hende a laga scopet cay, cual a causa cu esaki a los tiro di su mes. Ningun hende a keda herida, “pero cos por a caba hopi diferente,” segun polis di Rotterdam a bisa riba X.
Esnan envolvi den e pelea a core bay despues cu e scopet a los tiro. Polis a detene dos hende homber, ambos di 18 aña di edad, y ta investigando nan envolvimento den e incidente. Agentenan policial tambe a mira grabacion di monitorio, a papia cu testigonan y a sigura prueba. Mas detencion por sigui.
Net den oranan di marduga diabierna, rond 00:15, un hende a los tira riba un auto pasando riba e crusada di Zoutziederstraat y Mathenesserstraat na Rotterdam. E chauffeur a dal den un luz di trafico y un scooter, pero asina mes no a keda herida, segun polis. E agresor a huy di e scenario.
