Parlamentario Ryçond Santos do Nascimento: “Nos mester drecha nos cas financiero pa nos mes y si nos no haci’e ta un berguensa”

Durante un conferencia di prensa ayera mainta e parlamentario independiente Rycond Santos Do Nascimento, a bin dilanti cu Aruba no tin un bon maneho financiero y tampoco ta na ordo, lo cual ta fomenta corupcion.

“Ora bo ta fomenta corupcion di un pais, e ora mester compronde kico ta e resultado y kico ta e consecuencia di corupcion, pobresa. Kiermen awe si bo ta wak rond di bo y bo ta wak hende cu tin un salario di 2.500 florin of menos, e ora wak ken a goberna desde nos status aparte na e pais aki,” el a sigura.

Pensionadonan ta preocupa debi cu nan pension no ta yega, lo cual tin relacion cu esnan cu a goberna e pais aki pa 37 aña largo, manera el a señala y ta declara cu pa empresarionan chikito ta bin medidanan y mester haci e mesun pregunta, “ken a goberna den tur tempo aki?.”

E ora mester bay papia di supervision financiero no prome segun e ta cuestiona y no prome, “un di e coy loco cu Sra. Evelyn Wever-Croes ta manda Sra. Xiomara Maduro bay gana den pueblo ta cu e jaarrekening no ta mas cu mas simplemente cu un uitvoeringsrapportage y un uitvoering rapportage ta ekivalente y na mesun balor y esey ta un mentira, e ta asina confia cu a bo como ciudadano no ta bay busca e documento y no ta bay lesa pa bo mes, ciudadano bay busk’e riba e website di gobierno y bay lesa riba capitulo cuatro unda ta papia di finacieel beheer pasobra den e parti aki ta bay ripara kico e ta bisa di nos estado di finanzas publico y na e pais aki y nos capacidad di por produci un jaarrekening cu ta certifica door di un accounting of registeraccountant.”

E problema, segun Do Nascimento ta indica ta cu na 1986 Centraal Accounting Dienst (CAD) tabatin como 25 cu tabata traha, awe como 10 ambtenaar segun e mes a sigura, “con por ta posibel cu un poblacion di 60.000 habitante den e tempo CAD cu awe cu Gobierno ta hala como un miyon florin pa aña aden na impuesto y invoerrechten, con esey ta posibel?”

Di mesun manera, e ta afirma cu Algemene Rekenkamer ta mas mal para compara cu aña 1986 y cu Departamento di Finanzas no tin hende capacita awe pa por traha y haci trabou “mientras cu aparato gubernamental a ser yena, ta hopi ambtenaar tin pero pegado di bandera y campañado, esey tin y ken a bin cu nan?”

Den su opinion, votadonan cu a duna nan voto na MEP a duna su voto na AVP y contrario, debi cu nan ta esun cu a goberna for di 1986, cu problemanan financiero cu Aruba tin ta e causa di corupcion y ora tin corupcion, esey ta e causa di pobresa di e pais aki.

“Ta tempo pa nos studia e materia aki anto en bes di culpa Hulanda pa delaster cos, Sra. Evelyn Wever-Croes tin seis aña pa pone e finanzas publico na ordo pero e ta kies pa pleita cu Hulanda y keda rek e cos aki, gasta e tempo di ambtenaarnan cu ta tiki caba pa en bes di traha na drecha e situacion financiero keda haci problema cu Hulanda djis pa apacigua e votado di MEP, esey e ta, interes partidario.” El a expresa.

E realidad cu Do Nascimento ta mira cu un mal administracion financiero ta kibra un pais con corupcion unda por a mira loke a pasa cu FASE den tempo di pandemia y hasta prome cu esey cu cada biaha ora tabatin corupcion relata na proyectonan, fixmento di Friends&Family “tur ora tabatin un componente di mal administracion financiero y tur ora nos ta wak cu nos mesun organo a bisa caba, Algemene Rekenkamer a bisa bo caba cu tabatin un problema, Raad van Advies tambe a bisa, mescos cu CAD y awor bo ta warda pa Hulanda bin hari nos, bergonsa nos y e ora bo kier para pa autonomia, a bo a destrui e autonomia di e pais aki, ban drech’e pero MEP cu AVP no por haci’e.”

Pa loke ta trata e consecuencianan, e ta afirma cu e consecuencianan di esaki t’ey caba cu aumento di BBO cu a tuma luga, introduccion di BBO na frontera y otro medidanan cu a ser tuma, situacion di dump cu ta aumentando gasto di benta sushi na Aruba afo cu tin consecuencianan pa contratista y pa esun cu ta chapi “ora cu bo ta wak ki dia esaki ta bay tin consecuencia pa nos, nos ta bibando e consecuencianan caba di mal maneho financiero, no ta Hulanda a kita autonomia, nos parlamento hamas desde 1986 a manda un minister di Finanzas cas pa motibo cu no tabatin jaarrekening.”

E autonomia cu Aruba a haya cu status aparte por mira den statuut, den articulo 43 inciso 2 den cual ta bisa cu Hulanda tin un responsabilidad pa garantisa lo cual ta derechonan humano, bon gobernacion y e parti aki cu ta cay bou di dje, pero segun Do Nascimento ta señala, e no ta kita e responsabilidad primordial di e mesun pais “ora bo ta wak con Hulanda a procede, desde 1986 Hulanda no a actua di biaha, por bay hopi mas leu, just wak Sint Eustatius e cos a bira asina erg cu nan a pone gobierno un banda, e poder ey Hulanda tin, no a us’e y nos ta spera y pidi Dios cu nan lo no haci uso di dje, pero nos mester drecha nos cas financiero pa nos mes y si nos no haci’e ta un berguensa,” el a sigura.

Pa motibo cu tin un culpamento den sistema politico, unda berde ta culpa geel, geel ta culpa berde y “asina tur na final ta haci mes cos” pa e motibo aki Do Nascimento ta indica cu mester tin supervision, no for di Parlamento di Aruba pasobra manera e ta declara, “no ta haci su trabou manera debe ser” p’esey ta importante pa tin un supervision financiero externo, CAft tabatin e resultado desde 2015 “si nos no tabatin CAft, awe tur e aña nos lo tabatin deficitnan di 300 miyon of hasta 500 miyon florin tur aña pasobra esey tabata e trend cu tabatin.”

Den su experiencia como politico y parlamentario, e ta sugeri cu e solucion “no ta di e dificil ey, en bes di concentra manera cu a haci pa 37 aña pa yena e aparato gubernamental cu hende cu no ta capacita djis pasobra nan ta afilia na partido politico hayando salarionan 40% mas halto cu ever nan por haya cualkier otro caminda na e pais aki, esey ta e realidad y ora bo ta wak e profesional, e accounting of hurista, nan salario ta mas abou cu eyfo y esey ta un di e cosnan cu mester cambia, mester tin incentivo pa hende por traha den aparato, mester yena lo cual ta CDA, Departamento di Finanzas, entre otro, si nunca lo reforsa e aparatonan aki nunca bo por produci un presupuesto na tempo y structuralmente pasobra dos biaha un presupuesto na tempo ta un berguensa.” El a finalisa.