Mediante un comunicado di prensa Cuerpo di Polis di Aruba a informa tocante un accidente cu a tuma luga na Mahuma unda un persona a fayece.
Pa 9:09 di anochi central di polis ta wordo notifica cu tin un accidente caminda auto lo a dal un peaton na altura di Shahai Take Away. A despacha patruya policial, bombero y ambulance cu maximo urgencia na e sitio di accidente. Na yegada di patruya por a constata cu e peaton no tabata duna señal di bida.
Pa 9:45 di anochi dokter Scholten a constata morto di Esteban Maduro, ken a nace na Aruba dia 2 januari di 1942 y tabatin 81 aña. A pidi specialista di trafico como tambe polis tecnico na e sitio pa haci nan investigacion.
Ultimo accidente fatal tabata na juli
Na juli ultimo, specificamente dia 16 di juli, a tuma luga un otro lamentabel accidente na districto di Playa, den esaki Cuerpo di Polis a informa cu central di polis a haya e notificacion di un accidente entre dos auto na altura di Boolchand’s den Havenstraat na Oranjestad.
Polis a señala cu na yegada di patruya a topa cu e chauffeur di e auto Suzuki color shinishi gravemente herida unda a pidi ambulance cu maximo urgencia y na nan yegada e personal di ambulance a stabilisa e victima y transport’e mesora pa Dr. Horacio Oduber Hospital.
Na e sitio di e sucedido a presenta specialistanan di trafico, polis tecnico, fiscal y departamento di slachtofferhulp.
Diasabra despues di 11’or di anochi, polis a haya informacion cu e chauffeur involucra di accidente a fayece na Hospital.
Dokter a constata morto di e homber yama Hawin Harold J. Ruiz, naci na Aruba, dia 26 januari 1992 , e tabatin 37 aña y a bira e di seis morto den trafico pa aña 2023.
