Dia 29 di september Monica Robles a ricibi su titulo di Meester in de Rechten (Master of Laws) na Universidad di Aruba. Despues di 4 aña di trabao duro y esfuerso, Monica ta cla pa eherce su trabao como hurista na Aruba.
Monica a conta Bon Dia Aruba cu su estudio tabata uno cu hopi desafio, pero na mesun momento e tabata uno hopi interesante y valioso. “Danki na e estudio aki mi a desaroya hopi habilidadnan significativo pa por compronde nos leynan, conceptonan legal y analisa con e ley ta influencia nos sociedad y derechonan individual. Tur esaki sigur a capacitami pa awe mi por eherce un trabao como hurista,” el a remarca.
El a splica cu el a scoge pa studia ley pasobra semper el a sinti un pasion pa husticia y pa para pa e derecho nan di su mes y di un otro persona. Durante su estudio, el a indica, el a ripara cu e no mester ta precies un abogado pa por usa su conocemento y yuda un otro persona. Esey ta loke mas el a gusta di su estudio.
“Esey ta loke mas mi a gusta pasobra na mesun momento cu mi tabata siña mi por a pone mi conocemento den practica di biaha,” el a enfatisa.
Aworaki cu Monica a gradua, danki na su titulo e por eherce diferente funcion, pero ainda e no a tuma un decision definitivo di kico su siguiente paso lo bira. “Mi kier analisa hopi bon cual ta e siguiente stapnan y sigur mi lo scoge un funcion cu mas ta pasiona mi pa mi por start mi carera pa sigui crece y aporta na nos comunidad,” el a resalta.
