Na comienso di siman ex minister y politico Otmar Oduber a tene un conferencia di prensa unda cu el a toca diferente punto. Un di e puntonan cu el a elabora riba dje ta e actonan di vandalismo cua tuma luga recientemente ariba propiedad publico di parti di un grupo di persona cu ta contra e construccion di Secrets Hotel na Baby Beach.
Oduber a expresa cu e ta lamenta profundamente con algun hende kier vocifera nan opinion na un forma cu ta perhudica otro. Cu esaki e ta referi na un grupo di persona cu ta sinti, y cu el a remarca tin derecho pa sinti asina, cu nan no kier mas hotel na Aruba cu a cuminsa destrui propiedad publico.
El a recorda cu na 2018, e gobierno cu el a forma parti di dje e tempo ey como minister di infrastructura a introduci un voorbereidingsbesluit (decision preparatorio) caminda a introduci un moratorio ariba mas construccion di cambernan di hotel, condominio y apartamento.
E tempo ey caba tabatin riba shete mil camber otorga y terenonan comprometi cu a wordo duna door di gobiernonan anterior. El a remarca cu el a tuma dos aña pa negosha cu gran mayoria di e grupo aki pa reduci e cantidad di shete mil pa dos mil y pico camber.
Tur tabata terenonan cu ya caba a wordo otorga den pasado, 10 pa 15 aña prome cu a introduci e voorbereidingsbesluit.
El a enfatisa cu e motibo pakico el a menciona esaki ta pasobra e ta consciente cu gobierno mester tin un maneho pa e crecemento economico na Aruba, pero na mesun momento el a resalta cu no por para e crecemento aki.
Pa e motibo ey mes e ta lamenta cu tin hende cu ta discuti y bringa pa San Nicolas haya un hotel.
“Bo no ta wak niun di nan para na ningun di e proyectonan di hotel na playa pa critica esaki, pero ta critica e un hotel cu por crea desaroyo nobo pa henter e area aki di San Nicolas,” el a enfatisa.
