E batata cayente di e normanan acorda den e Protocol di november 2018, cu nunca a keda inclui den e ley di supervision financiero di Aruba (Landsverordening Aruba financieel toezicht; LAft), ta back den scochi di gobierno di Aruba. Aparentemente e ministro encarga cu Vivienda Popular y Ordenamento Teritorial, despues cu gobierno Hulandes a bira demisionario, a haya na su encargo Asunto Interior y Asunto di Reino, y ta drenta cu un tono diferente na loke nos tabata custumbra cu e señora secretario di estado, cu tabata papia sin revela tanto, y tabata sinti su mes comodo cu e expresion Hulandes ‘pappen en nathouden’ . Su colega den e gabinete demisionario sin embargo a opta pa papia cla. Y ta cosnan cu nos no a haya di tende di nos propio gobierno… ‘So much for transparency’, nos lo bisa, custumbra caba cu e ta mas bien un lema bashi.

Por cierto cu tabatin un reunion di Gobierno di Reino siman pasa, unda nos en berdad no a tende e detayenan cu sin duda lo mester a bin dilanti, pasobra e tema di Aruba a keda trata, segun e propio ministro plenipotenciario. Pero manera semper, ta yega un momento cu e berdad ta sali. Y ta resulta cu tin basta trabao pa haci. Di repente e asunto financiero, con pa yega na un acuerdo tocante esey, a bira menos relevante y loke ta subi tarima awor ta e asunto di e normanan financiero y e aprobacion di esaki den e ley di Aruba. Esaki pa duna contesta na e interogante cu tabata surgiendo caba, kico ta bay sucede cu e supervision financiero si pa 1 di januari 2024 no tin un protocol cu ta stipula e criterionan pa supervision di presupuesto pa 2024 y eventualmente pa e añanan despues. Pa tur claridad: gobierno di Aruba a maneha e normanan cu ta na vigor te cu 2023 tambe den e presupuesto 2024, y esey anto no ta e discusion. Loke si ta e discusion ta cu Hulanda kier mira nan preto riba blanco na un lugar, y como cu e ley di Reino no ta keda cla por lo pronto, ta spera di gobierno di Aruba cu ta haci e cambio tan odia den e ley local di supervision… E ministro Hulandes den su carta ta tilda gobierno di Aruba di ta un partner no confiable, pasobra a keda sin pasa e cambionan acorda den e ley. Y cu e desconfianza Hulandes ta basa riba loke a pasa na 2019, cu a haci cu te awe e cambionan no a bay den e ley, pero a traha a base di e ley combina cu e stipulacionnan di e Protocol. Esey ta parce un ‘gepasseerd station’ awor y ta pone gobierno di Aruba ‘entre la espada y la pared’, cu e exigencia di kier mira e cambionan haci den e ley di Aruba, pa por habri 2024 cu supervision y criterionan sigura…

Nos por comprende tambe cu nos ministro plenipotenciario no tabatin mucho gana di toca e tema ey, pasobra na 2019 e mes tabata un di e protagonistanan den e ‘sabotahe’ cu a tuma lugar cu e cambionan acorda den e Protocol menciona cu mester a bay den e ley di supervision di Aruba, cu no a bay aden, sino un atraco bergonzoso unda kier a ‘delete’ nomber di Gobierno di Reino y reemplaza esaki cu Parlamento di Aruba. Cu esaki principalmente e dos conspiradornan principal, cu awe ta ministro encarga cu Asunto Social y Husticia, y ministro plenipotenciario, ta mira algo ta bin back pa nan, cu nan probablemente no a spera. E bala ta claramente riba cancha di gobierno di Aruba. Nan por cumpli cu e deseo di gobierno Hulandes, y por continua cu e negociacionnan pa e modelo ‘hibrido’ sin un deadline pronto pa esaki. Teoricamente por opone e deseo di e ministro Hulandes tambe, pero no ta parce nos cu esey lo ta e ruta pa scoge. E ta requeri si cu e fraccionnan gubernamental ta comprende bon cla cu no por tin wega cu e asunto aki, manera tabatin na 2019. Ta bon pa nos detaya con e situacion ta diferente cu e asunto cuatro aña pasa. E tempo aya tabatin un protocol vigente pa algun aña, y despues di e bochorno menciona den Staten entre gobierno di Aruba y di Hulanda a yega na e acuerdo pa maneha e ley y e protocol hunto. Sin embargo awor Hulanda no kier prolonga ningun protocol mas, tambe pa e iritacion cu e asunto di prestamo y condicion di pago ta bin ta lastra desde 2020 caba; nos ta tres aña y mey mas leu y ainda no tin nada regla… Por ta cu esaki a haci cu e ministro no a laga e asunto den man di su secretario di estado, pero e mes a tuma rienda den su man.

Tur esaki ta haci cu mester bin un fin tambe na e wega di nos Promer Ministro, di keda sconde tras di e supuesto ‘independencia’ o ‘autonomia’ di parlamento, mientras cu den otro asunto nan ta parce un manada di carne pa please gobierno. Nos no ta bisa cu esey no por pasa atrobe, pero e ora gobierno y su apoyo parlamentario mester tene bon cuenta cu e supervision por yega den un Algemene Maatregel van Rijksbestuur, cu ta regla por ehemplo e supervision di CAft y e normanan di presupuesto, te ora tin un ley di Reino. Por cierto cu e ministro plenipotenciario a menciona den un recien entrevista cu Hulanda tin e arma ey… Sano huicio y actuacion diligente mester por preveni esey.