Sani Coffe Fest a tuma luga ayera diadomingo na San Nicolas unda cu for di oranan trempan mainta e bishitantenan a asisti na Museo di Industria pa wak con e negoshi di koffie na Aruba ta y a duna reconocemento na varios persona relaciona cu e negoshi aki na Aruba.

Dia 1 di october ta celebra Dia Internacional di Koffie. Un fecha asigna door di e Organisacion Mundial di Coffee (OIC) pa apoya e cunukeronan di koffie y tur comerciante di producto di koffie.

E aña aki pa prome biaha, Ministerio di Cultura conhuntamente cu Fundacion Monumento Aruba (FMA), a conmemora y celebra e dia aki durante e Sani Coffee Fest, cu ta un ‘Koffie Morgen’ manera ta conoci den cultura di Aruba cu e presencia di varios negoshi cu a expone y duna presentacion y bende nan productonan elabora cu koffie. Ademas di un variedad di snack y articulonan cu hendenan a disfruta.

Den cuadro di e evento aki, Ministerio di Cultura hunto cu FMA, a haci reconocimento na varios persona cu tabata protagonista, durante decadanan di añanan 60 y 70 di e negoshi di koffie, tempo cu Aruba a bira un exportado grandi di e producto aki pa henter mundo, sin cultiva ni cosecha niun pipita di e planta.

Tabatin varios tent pafo ofreciendo koffie, cuminda y coy bebe pa esnan cu a bay wak e actividad aki.

Benjamin Romero ken ta periodista y autor di e buki cu ta compila e historia aki, E Negoshi di Koffie na Aruba, a señala cu e sinti su mes masha honra “tanto cu Ministerio di Cultura como FMA por a organisa e evento aki cu a bira e antesala di un exposicion permanente di e capitulo di e negoshi di koffie como parti di nos desaroyo economico den Museo di Industria, Torenstraat, San Nicolas.”

Riba Dia internacional di Koffie, recordando e negoshi skirbi pa Clyde Harms

E anuncio y invitacion publico pa e Sani Coffee Fest 2023 a evoca hopi memoria di e participacion di Harms den e negoshi di koffie. Pa hopi aña Aruba tabata e punto principal di unda e koffie di Colombia tabata exporta pa tur skina di mundo, pero alrededor di aña 1975, pa via di un ley cu gobierno a pasa na Colombia, e negoshi di koffie na Aruba a explota manera un bom atomico, y a obliga esnan den e negoshi tuma decisionnan drastico.

Su ruman Nel Harms kende a traha hopi aña den e ramo aki, a mustra su talentonan como comerciante y a tuma decisionnan completamente “outside-the-box”.

Nel a realisa cu e negoshi tabata rekeri comunicacion inmediato, specialmente cu e bolsa di koffie na New York, pero tambe pa otro motibonan cu por afecta e prijs di koffie e dia ey. Aruba no tabatin conexion telefonico directo pa resto di mundo. Hasta pa haci un yamada pa Corsou mester a yama un operadora pa e busca e conexion. Y despues mester a warda, tin bes oranan largo, pa e operadora por completa e yamada. E solucion di e tempo ey tabata pa usa servicio “telex” cu tambe tabatin su problemanan.

Nel Harms tabata sa cu na Boneiro si nan a haya conexion mundial. Nel a cumpra un cas na Boneiro y a pone un oficina cu telefon.

Pa mas eficiencia Nel a cumpra un avioneta cu por a hib’e y tres’e segun e necesidad surgi. El a cuminsa uza e avion tambe pa e ehecutivonan di Harms Brothers bay Maracaibo for di unda nan por a bay Maicao, e curason di nan negoshi.

Pa transporta e koffie di Aruba pa Miami, Nel a usa su propio bapor chikito cu e tabata usa pa transporta cos pa Islas Virgenes. E bapor aki tabata carga e nomber “Mario E.” pa honra su tata.

Pa almacena e koffie na Miami el a huur un warehouse gigantesco den e bario Hialeah y el a mester a maneha esaki. E warehouse tabatin un entrada special pa trein drenta y ricibi koffie pa nan clientenan. Na dado momento, nan tabatin casi $6,000,000.00 (si, 6 miyon) na koffie den e warehouse!

Den poco tempo nan a realisa cu e bapor Mario E. tabata mucho chikito pa e cantidad di koffie cu nan tabata transporta. A dicidi di cumpra uno mas grandi na Noruega pa hiba koffie Miami y us’e pa trece carga di Miami pa Aruba, Corsou y Bonaire.

Pa firma e actonan di compra na Noruega, el a bay Oslo cu e capitan di Mario E. E capitan a keda encarga pa hiba e bapor Aruba. Mustrando su amor grandi pa su mama, Nel a yama e bapor aki “Catherine F”. Pa maneha e dos bapornan, Nel a crea Arubon Shipping Co. cu oficina den e warehouse na Hialeah.

Potretnan ta cortesia di Hilario Donker.