E lesnan respectivamente den klas 5 y 6 ta bay trata di diferente topico manera por ehemplo norma y balornan, conoce nan mes, contact cu mayor y asina mas topico cu e meta di traha preventivo y stimula escogencianan sano den e hoben nan. Ta pone hopi enfasis ariba e parti social emocional y e bienestar en general di e mucha.

Pa cu esaki a ofrece dianan di capacitacion pa maestronan y tambe diferente ronda di informacion pa mayor for di dia 18 pa 23 di september 2023 en conexion cu introduccion di programa di educacion sexual, Biba Amor. Maestronan di klas 5 y 6, cabesante, ib’ers y docentenan di Movecion di Salud a asisti na un dia di estudio.

E training y programa a wordo ofreci door di BSc. Pharetza Berdat-Damon cu cooperacion di Ministerio di Salud, Ambiente y Naturalesa di Corsou.

E programa ta consisti di un “lespakket”, cu ta enfoca pa amplia e conocemento encuanto e fasenan di desaroyo, entre otro, adolescencia, desaroyo sexual na nivel di e alumno, anticonceptivo y malesa cu por transmiti sexualmente. Tambe a enfatisa riba e bienestar social emocional di e alumno, riba habilidad social y actitudnan pa haci escogencianan consciente riba tereno sexual. SKOA y SPCOA a introduci e metodo Biba Amor desde basta tempo atras.

E proyecto ta conta cu cooperacion estrecho di Wit Gele Kruis Aruba afdeling Tienermoeder, encabesa pa Sra. Monique Giel-Labad.

Nan a gradici na FADA pa e aporte durante e anochinan di informacion na mayor cu presentacion di e tema y aspectonan di salud mental. A elabora encuanto con pa reconoce señalnan y na unda por busca ayudo.

Na december di aña 2022, minister di Enseñansa y Deporte, Endy Croes a bisa cu semper ta habri pa scucha tur inkietud y preocupacion di comunidad pa asina trece solucion na bienestar di enseñansa.

Un tema cu semper ta hopi den publicidad; ta educacion sexual na scolnan Primario. Un topico den cual opinionnan ta dividi. Buscando solucion concreto na bienestar di enseñansa, a tuma e decision cu ta implementa e metodo Biba Amor tambe na scolnan cu ta resorta bou di DPS. SKOA y SPCOA ta usando e metodo aki pa basta tempo caba.

Biba Amor ta un metodo cu ta ser duna den colaboracion cu Wit Gele Kruis Aruba. Biba Amor ta un metodo structura cu ta trata diferente topico entre otro respet pa bo curpa y pa otro, norma y balornan y hopi topico mas. E metodo ta informa mayornan adelanta y debidamente di e topiconan cu lo ser trata. Como tambe por brinda guia na e alumno y mayornan. Esaki ta bira un parti structural di e curiculo bou di e materia “Maatschappijleer” / Movecion y Salud. Dos maestro di cada scol ta wordo debidamente prepara pa duna e materia aki. Meta di Biba Amor ta pa baha e cifra di embaraso hubenil y esaki a logra exitosamente.