Dianan di calor pisa y temperatura halto ta keda afecta Aruba y su hendenan. Pa motibo di esaki, Elmar NV a publica ariba nan pagina di Facebook un aviso pa tur ciudadano tene cuenta pa loke tatrata temporada di calor.

“Aruba, mantene bo mes sigur y fresco mientras e temperatura ta sigui na 33°C. E condicionnan aki ta desafiante,” e publicacion ta remarca.

Manera ta conoci normalmente e temporada di calor na Aruba ta cuminsa den luna di juni te cu luna september. E aña aki, den luna di mei Aruba a experimenta un ola di calor (heat wave) inespera cual e compania ta señala ta un indicacion di e cambio di temperaturanan global na mundo.

Den e publicacion a reslata algun tips cu lo yuda e ciudadanonan den tanto consumo di coriente como tambe cuido personal pa keda sano den e calor pisa cu tin aworaki.

“Pa mantene comodidad y alabes control riba e consumo di coriente, nos ta recomenda pa ahusta e termostat di bo airco no menos cu 8 grado bou di e temperatura p’afo. Pa asina sostene bo hogar comodo mientras ta considera impacto energetico,” e compania ta indica.

Nan ta recomenda tambe pa ta cauteloso, bebe hopi awa, busca sombra si tin cu pasa tempo den e solo cayente, y cubri bentana cu cortina of “blinds” pa reduci e impacto di e rayonan di solo.

Ta importante pa den temporada di calor pisa ciudadnonan ta na altura di kico ta ‘heat stroke y e sintomanan di esaki. Heatstroke ta un condicion hopi delicado caminda cu e curpa ta stop di soda. E temperatura di curpa ta sigui subi mas cu 40° grado Celsius y ta perhudica e centro di control cu ta regula e temperatura corporal den nos celebro.

Sintomanan di un heatstroke ta:

Temperatura corporal halto den corto tempo

Cara y cuero cora y seco

No ta soda mas

Curazon ta bati dura

Dolor di cabez

Mente ta bira confuso y por cay flow

Por cuminsa saca of haña diaree

Kico pa haci den caso di un Heatstroke ?

Busca asistencia medico mesora yama 911

Tene e persona trankil y den fresco

Los e pañanan na su curpa.

Fria e curpa cu un serbete/paña muha (cu awa friu of di cranchi)

Por pone ijs of icepack bou di brasa, na nek, lomba, riba stoma y/of memey di e pianan.

Si persona ta consciente lag’a bebe awa no mucho friu.