Cu e obhetivo di trece e comunidad di Aruba hunto pa mustra diferente strategianan innovativo, herment y practicanan hopi valioso tanto pa muchanan como pa hobennan, den luna di november lo tuma luga “Happy Parents, Happy Children Conference” na Cas di Cultura.

Tambe den conexion cu Dia Internacional di Mucha, Kindra de Cuba-Sprok ken ta un di e organisado di e evento aki a señala cu e seminario ta pa provee na mayornan, educadornan y entrenadornan y tur persona cu ta atende cu desaroyo y cuido di muchanan y hobennan e hermentnan necesario basa riba estudionan haci for di expertonan, oradornan local y internacional caminda cu nan ta bay toca topiconan manera comunicacion, parti social di muchanan y tur lo cual nan ta experiencia pa asina nan por lanta den un generacion firme y stabiel den comunidad di Aruba.

E fecha di e seminario ta dia 14 y 15 di november na Cas di Cultura for di 6or di atardi pa 9or di anochi.

E conferencia ta parti den dos dia pa motibo cu dia 14 di november e topico ta basa den muchanan entre 0 y 10 aña, dia 15 di november e topico ta enfoca riba hobennan di 11 pa 18 aña.

E host y moderador ta Laura Tromp ken ta bay bin Aruba for di Hulanda y e ta un parent coach, ademas ta bay tin oradornan internacional como Stephanie Pinto ken ta emocional intelligence parent coach, Destini Ann Davis ken ta un certified parent coach y autor di e buki “Very Intentional Parenting”, un orador local cu tambe ta bay ta presente ta e psicologo Johnny Boekhout, entre otro.

Asina mes, De Cuba-Sprok a informa cu durante e seminario ta bay tin un Happy Expo Launch unda mayornan y publico assistent ta bay encontra tur organisacion, instancia of compania cu ta trata cu mucha y cu ta ofrece un servicio na e muchanan of hobennan cu ta bay duna informacion y otro hermentnan cu den caso aki, por haya actividad pa muchanan y hobennan.

Happy Expo Launch ta bay cuminsa for di 5or di atardi y pa e motibo ey nan ta pidi na esnan cu ta bay asisti na e conferencia pa yega trempan y por experiencia e evento y conferencia aki.

Pa esnan interesa di haya mas informacion di e conferencia aki por tuma contact mediante nan e-mail: pisotresaruba@gmail.com