Ayera mainta dilanti Parlamento di Aruba a tuma luga un manifestacion na unda Sindicato TOPA (Trahadonan Organisa di Sector Publico di Aruba) a haci entrega di un manifiesto y rapport relaciona cu e tema di Prestatiemanagement Sisteem na Prome Minister, Evelyn Wever-Croes compaña pa Minister Geoffrey Wever y Minister Rocco Tjon.
A traves di un video publica ariba pagina di Facebook oficial di Gabinete Wever-Croes II y comunicado di prensa, Prome Minister a indica cu sindicato TOPA a acerca gobierno cu e manifiesto ariba e tema Prestatiemanagement Sisteem.
El a splica cu e sistema aki ta un sistema cu e “ta kere” tur hende ta convenci cu ta importante pa sector publico na Aruba. El a sigui splica cu e ta un sistema uniforme pa evalua e funcionamento di tur empleado publico pa asina por mira con e trabao ta bayendo y si e empleado ta bin na remarke pa un promocion.
Prome Minister a remarca cu Gobierno di Aruba a bin cu e sistema aki pasobra no tabatin un sistema uniforme den henter gobierno. El a señala cu tabatin algun departamento di gobierno cu si tin nan propio sistema, pero tin otro departamentonan cu no tin un sistema asina elabora.
El a agrega cu tin empleado publico ta reclama cu na un departamento tin empleado publico tin promocion facil y na otro departamento ta dificil. Otro empleado publico ta reclama cu ora nan wordo evalua nan no sa riba kico nan ta wordo evalua y cu ta te na fin di aña nan ta tende kico nan a haci malo y esey, el a subraya, ta cosnan cu no por pasa mas den e tempo aki.
“Cu e Prestatiemanagement Sisteem cada empleado sa di adelanta riba kico e ta wordo evalua y e empleado mes ta indica tambe kico ta e tarea- y e metanan cu e kier logra. Durante di aña, e hefe di departamento lo evalua cada empleado. Esaki ta un sistema cu nos tur, sigur ta para su tras,” el a enfatisa.
E mandatario a splica cu aña pasa gobierno a introduci e sistema aki y e ley a drenta na vigor dia 1 di januari e aña aki, sinembargo sindicatonan a acerca gobierno y a pidi pa trece algun cambio na e ley di Prestatiemanagement Sisteem.
El a indica cu gobierno a invita tur sindicato pa sinta na mesa y sindicato TOPA ta e unico sindicato cu a sigui na mesa cu gobierno, y nan a trece algun punto pa dilanti.
Durante e entrega di manifiesto, sindicato TOPA a entrega nan rapport ariba e tema, e mesun rapport cu nan a entrega den luna di juni na e comision cu a ser institui pero cu nan no a ricibi ningun contesta riba dje.
Cu e entrega di e manifiesto y rapport aki sindicato TOPA a pidi un contesta for di gobierno dentro di dos siman pa asina por trece aclaracion ariba e topico aki.
“Mi a gradici nan pa semper ta na mesa, pa semper tin un actitud y posicion constructivo pa yega na solucion y sigur nos lo sinta cu nan y duna un contesta riba nan preocupacionnan cu nan tin,” el a remarca.
Prome Minister a splica cu e aña aki ta e aña piloto pa loke ta trata e Prestatiemanagement Sisteem y ta desea, hunto cu e sindicato cu ta na mesa cu gobierno, yega na un solucion pa finalisa e aña piloto aki pa asina otro aña, 1 di januari 2024, por cuminsa implementa e sistema aki completamente desaroya y estableci teniendo na cuenta cu locual e sindicatonan a trece pa dilanti.
Den luna di maart ultimo sindicatonan SADA, SEPPA, SIMAR, FTA y SPA a manda peticion na gobierno y a pone dia 30 di maart como fecha final pa elimina e ley di Prestatiemanagement Sisteem. Locual no tabata e caso y a pesar cu gobierno a extende invitacion pa sindicatonan sinta na mesa pa yega na un solucion, nan a dicidi cu nan no ta sinta den un comision tecnico mientras cu no elimina e ley.
E ley di prestatiemanagement Sisteem ta un obligacion den e Landspakket, pues tabata mir’e bin caba. E decreto concerni (Landsbesluit prestatiebeoordeling AB2022 no. 165), cu ta basa riba articulo 15 di LMA, inciso dos, ta elimina tambe e proceso actual di evaluacion di brandweer, douane y polis y ta trece nan bao di e decreto general aki, loke ta parce un bon paso y indicacion di e uniformidad necesario.
E decreto a base di cual lo bay actua, ta regla e proceso di intercambio cu e empleado, desde e momento cu ta planifica na inicio di aña kico lo ta e tareanan/trabao di e persona, mas e evaluacion intermedio y final den cual ta haya un bista total di loke ta e prestacion di e persona. Y despues di esaki, tambe e consecuencianan cu evaluacion, sigur den caso negativo, ta bay tin.
Cu esaki, gobierno por fin ta introduciendo un manera di atende prestacion cu ta practica comun na varios entidad semi-gubernamental y tambe na hopi empresa den sector priva.
E sistema ta trece consecuencia tambe. Den caso di un evaluacion negativo, e empleado por keda sin haya e aumento periodico, cu tabata automatico, pero cu e decreto aki a bira algo cu ta tuma lugar solamente si e evaluacion ta positivo. Cu esaki, gobierno ta cumpliendo tambe cu un di e exigencianan Hulandes, formula den e Landspakket. Pero e posibilidad t’ey ainda cu un mandatario ta dicidi pa den cierto caso, a pesar di e evaluacion negativo, e empleado haya su aumento toch.
E decreto ademas ta habri e posibilidad pa cuminsa e trayecto di retiro di un empleado publico, si su cumplimento ta bao nivel pa tres aña consecutivo. Den esaki ta tene cuenta cu loke ta stipula den articulo 98, inciso 1, sub f, cu ta trata e posibilidad di retiro pa incapacidad of ineptitud pa eherce e puesto den cual el a funciona, si no ta trata di deficiencia psikico of corporal.
