Ayera tardi ariba nan pagina oficial di Facebook Departamento di DOW a brinda un actualisacion ariba e proyecto di RWA na Palm Beach. Segun e actualisacion DOW ta informa cu pa fin di october e trabaonan lo keda cla y lo habri e caminda aki back.

“Actualmente e contratista ta bezig cu e wapening di e supervloer cu ta bin riba e duiker. Diabierna awor lo basha esaki cu concrete. Otro siman ta cuminsa cu e trabounan di preparacion den e bermnan, pa pone e kabelnan di utilidadnan bek nan na lugar y pa despues cera e berm nan,” e departamento a indica.

Nan ta premira cu e siman despues e concrete a cura y asina nan por cuminsa cu e trabounan di e caminda, pa e por wordo yena y despues pone asfalt pa finalmente na final di october habri e caminda back.

E trabaonan di e proyecto aki a cuminsa for di 27 di maart di e aña aki. Den un comunicado di prensa, tabata indica cu dia 27 di maart 2023 a cuminsa cu e proyecto aki. E proyecto aki tabata parti den diferente fase na unda fase 1 tabata pa mehora e drenahe dilanti Citgo Palm Beach y renoba e asfalt for di Citgo Palm Beach te cu Botica Santa Anna.

Fase 2 a encera ampliacion di e capacidad di awa y structura e muraya di e duiker na e crusada di e tanki na Palm Beach. Fase 3 tabata amplia e capacidad di e duiker na Keito y fase 4 ta asfalta y mehora e fluho di awa na e caminda di tera na altura di Palm Beach 94B.

Durante e construccion tabata tin dos retraso. E prome retraso a surgi ora e coba e sleuf pa instala e tuberia nobo y a encontra kabel y tuberianan imprevisto cu a resulta daña y mester a drecha esaki prome cu a sigui.

E di dos retraso a resulta di ta e contratista principal cu a wordo afecta door di su mesun proyectonan cu e tin den ehecucion pa cual a resulta den problema temporal di logistica y financiero. Mientrastanto e problema di e contratista a wordo resolvi y e reanuda trabaonan na mei 2023.

DOW enontra cu ora nan a kita e deksel den caminda, e vloer y wand tabata den hopi mal estado. Tambe nan a constata cu comerciantenan a conecta awa di riool, vet y awa di wasbak den e bakprofiel cu nan mester atende cune pa coregi esaki pe evita cu ta sigui contamina medio ambiente. Esaki a resulta den otro retraso.