(NLTimes)—Mita di e aproximadamente 68.000 refugiado Ucraniano cu a huy bay Hulanda desde cu Rusia a invadi nan pais tin trabao paga riba 1 di mei, segun oficina di estadistica (CBS) a reporta ayera. Nan ta traha principalmente pa agencianan di empleo of den comercio, transporte y e sector di hospitalidad.
Riba 1 di november aña pasa, 44% di refugiadonan Ucraniano na Hulanda tabatin trabao. Al contrario cu otro buscadonan di asilo, refugiadonan Ucraniano no mester permiso di trabao pa participa den e mercado di labor Hulandes.
E proporcion di refugiadonan Ucraniano trahando ta basicamente distribui igualmente entre hende homber y hende muhe, cu 51% di hende muhe y 49% di hende homber Ucraniano tin trabao paga na Hulanda. Tur grupo di edad tambe ta bon representa—44% di hobennan entre 15 cu 25 aña, 55% di hendenan 25 pa 45 aña y 47% di hendenan 45 pa 65 aña tabatin trabao paga riba 1 di mei.
Mayoria refugiado Ucraniano a traha como empleadonan temporario (38%), trahadonan “on-call” (28%) of tabatin otro tipo di empleo temporario (31%). Solamente 18% a traha full-time, 35 ora of mas pa siman. Probablemente debi na e proporcion grandi di trahadonan temporario, refugiadonan a cambia di empleador relativamente frecuente. Di esnan cu tabatin trabao paga riba 1 di juli aña pasa y 1 di mei e aña aki, 39% a cambia di empleador durante e periodo ey.
E mayoria di refugiado Ucraniano (51%) a traha den e sector di servicio empresario, cual ta inclui agencianan di empleo. Hopi refugiado (31%) tambe a traha den comercio, transporte, y den e sector di hospitalidad.
Un estudio pa Inholland University of Applied Sciences entre 903 Ucraniano a mustra cu solamente 30% ta satisfecho cu nan trabao na Hulanda. Mientras cu 59% ta insatisfecho cu e oportunidadnan pa haya trabao cu ta cuadra cu nan experticio y nivel di educacion. Den practica, Ucranianonan ta haya trabao principalmente den profesionnan di servicio cu no ta rekeri mucho talento. “Pero al menos dos tercer di Ucranianonan ta sumamente educa,” e investigadonan a bisa.
Un obstaculo grandi pa Ucranianonan den e mercado di labor Hulandes ta nan inhabilidad pa papia Hulandes. Solamente 3% a considera nan Hulandes bon. Tambe nan a cita insuficiente acceso pa training di lenguahe bon y pagabel, cuido hubenil y insiguridad financiero como obstaculonan. “E hecho cu e futuro di nan status legal ta incierto ta hunga un rol: Ucranianonan ta experencia cu empleadornan ta considera esaki como un motibo valido pa ser dudoso,” e investigadonan a conclui.
