Durante conferencia di prensa dialuna mainta Prome Minister, Evelyn Wever-Croes, a elabora ariba su biahe pa New York pa e Asamblea General 78 di Nacionnan Uni na unda tur e lidernan di diferente pais di rond mundo ta bini hunto pa traha riba con pa mehora e mundo.

Prome Minister a splica cu durante e Asamblea General e metanan di desaroyo sostenibel, Sustainable Development Goals (SDG) ta e punto central rond di cual e diferente reunionnan ta tuma luga. El a elabora ariba diferente topico cu e toca y cu a trece pa dilanti durante encuentronan cu a tuma luga.

El a indica cu un di e topiconan cu a discuti den liñanan grandi tabata e tema di energia na unda a splica tocante Aruba su Nacional Energy Policy como meta pa baha e emision di CO2 na Aruba y contribui tambe na reduccion di calentamento global.

El informa cu el a splica e plannan di Aruba con ariba termino mediano ta bay traha riba un transicion pa un fuente di energia mas limpi y con a termino largo Aruba ta bay percura pa no depende mas di HFO y cu no ta bay tin mas emision di CO2.

El a agrega cu el a urgi e paisnan mas grandi pa tambe tene nan mes na e acuerdo y yuda den e tereno aki y combati calentamento global. “Tambe mi a urgi paisnan grandi pa nan tene nan parti di e acuerdo aki, Aruba ta bay cumpli cu esey, pero ta importante pa henter mundo cumpli cune pasobra con cu bay bin nos ta un pais hopi chikito na mundo y si nos cumpli cune y hinca tur e inversion den dje, e no ta bay tin un efecto hopi grandi ariba e efecto mundial, pero si nos ta bay haya tur e daño y consecuencianan negativo,” el a remarca.

El a informa cu e tabata un orador na un conferencia titula ‘Finance for Development’, un conferencia na unda ta trece pa dilanti con por yega na fondonan pa por cumpli cu e plannan cu islanan chikito, SIDS, tin, paisnan cu tin debe halto di prome cu pandemia, paisnan cu tin debe halto di e pandemia tambe y cu ainda mester tin un fondo grandi di inversion pa por haci e transicion di energia.

Durante e conferencia aki Prome Minister a trece e caso di Aruba pa dilanti y a splica specialmente con dificil e ta pa Aruba como pais cu ta parti di Reino Hulandes, cu ta un pais cu ta haci donacion na Nacionnan Uni, pa haya donacion for di Nacionnan Uni pa por cumpli cu su proyectonan.

“Nan ta mira nos como un pais hopi rico y consecuentemente nan ta enfoca ariba otro paisnan, sinembargo nos tin nos retonan y esey ta locual cu mi a trece pa dilanti,” el a resalta.

Otro tema cu e mandatario a señala cu a haya hopi atencion tabata e tema di innovacion, cual ta parti di e cartera di Prome Minister y como minister encarga cu e cartera aki el a pone extra atencion y enfasis ariba esaki.

Ariba e tema aki, Prome Minister tabata un orador invita na un conferencia riba e tema di e-government tocante con ta hinca digitalisacion den gobiernonan. El a remarca cu a traves di Futura, Gobierno di Aruba a cera un MoU cu MasterCard cu ta dispuesto pa asisti Aruba den tereno aki.

Ademas di esaki e mandatario tabata invitado na un conferencia cu tabata dirigi ariba un iniciativa cu ta busca pa yega na 25 miyon mucha muhe rond mundo pa prepara nan, siña nan tocante inteligencia artificial y asina nan por bira ‘future shapers’.

“Nos ta sigur cu nos mucha muhernan mester un extra empuho pa asina nan por participa den e trabao y profesionnan den futuro. Nos sa cu no ta tur ora nos mucha muhenan ta esunnan interesa den e aspectonan tecnico, p’esey a lansa e iniciativa aki,” Prome Minister a indica.

Durante e conferencia, el a menciona, el a conta di e proyecto di Supernova cu ta e proyecto cu tin a traves di Futura den cual ta purba di yega na mas hopi mucha muhe posibel na Aruba pa laga nan conoce mas di tecnologia y laga nan ta mas interesa den e tereno aki tambe.

Otro topico ariba tereno di innovacion cu a toca tabata enseñansa y den esaki, Prome Minister a trece pa dilanti EduTech y con importante esaki ta pa trece den enseñansa. Esaki tabata un encuentro organisa pa Union Europeo na unda varios pais tabata presente.

Otro tema importante tabata infrastructura y den esaki, e mandatario indica cu manera ya ta conoci na Aruba tin reto grandi den e aspecto aki mirando cu e careteranan di Aruba ta den basta mal estado. Esaki, el a enfatisa, tin di haber cu no tabatin un plan consistente pa mantene e careteranan prome cu pandemia, pero debi na e pandemia a kita tur e fondanan cu tabatin aloca pa mantencion di caretera.

“Aworaki nos kier yega na un sistema na unda structuralmente tin fondo aloca pa drecha e calidad di e careteranan, pero esey no lo ta suficiente. Nos a pidi DOW y expertonan pa traha riba un plan con den 10 aña lo por yega na drecha tur e careteranan di Aruba,” el a enfatisa.

El a agrega cu e careteranan ta wordo mas afecta aworaki door di e cambio climatico, pasobra ora awa yobe e ta yobe mas severamente y esey ta pone cu e estado di careteranan ta deteriora mas lihe. “Nos kier introduci e plan aki como un plan di adaptacion pa cambio di clima,” el a indica.

Un tema cu e mandatario ta resalta a toca tur ora na Nacionnan Uni ta e posicion di hende muhe. El a splica cu hunto cu UN Women a reuni ariba tema aki, a papia di gender policy (politica di genero), con por fortifica e posicion di hende muhe y e aña aki, el resalta, tabatin otro dinamica cu tabata e Feminist Foreign Policy.

Esaki, el a sigui splica, ta un maneho ariba tereno di relacion exterior caminda cu un pais, den e caso aki Reino Hulandes, a compromete su mes cu no ta haci negoshi cu paisnan cu no ta respeta posicion di hende muhe.

“E punto di salida di e Feminist Foreign Policy ta cu hende muhe mester por reclama nan derecho universal y nan mester por representa na tur nivel,” el a subraya.

Por ultimo e mandatario a reuni tambe ariba e tema di Venezuela cu Minister di Relacion Exterior di Hulanda y e director general di Asuntonan Politico di Relacion Exterior.

El a enfatisa cu Reino a ratifica cu nan no ta reconoce e presidencia di Nicolas Maduro, cu e relacion entre Reino y Venezuela no a normalisa ainda y Reino a ratifica tambe cu pa esaki normalisa, por ehemplo, mester tin eleccionnan cu ta husto.